8 śniežnia ŭ Brusieli ministry zamiežnych spraŭ krain Jeŭrasajuza i krainy, uklučanyja ŭ prahramu ES «Uschodniaje partniorstva», abmiarkujuć chod jaje realizacyi. Sustreča stanie pieršaj štohadovaj naradaj kiraŭnikoŭ MZS.
Jak paviedamlaje pres‑słužba zamiežnapalityčnaha viedamstva Biełarusi, kiraŭnik MZS Siarhiej Martynaŭ pradstavić aficyjnuju pazicyju Minska adnosna raźvićcia palityki i dalejšaha ŭdziełu ŭ joj Biełarusi.
Martynaŭ praviadzie pieramovy pa ŭsim kompleksie pytańniaŭ supracoŭnictva Biełaruś‑ES z pryznačanym členam Jeŭrakamisii pa pytańniach pašyreńnia ES i Jeŭrapiejskaj palitycy dobrasusiedstva Štefanam Fiule.
Kiraŭnik MZS Biełarusi taksama płanuje abmierkavać z šeraham kaleh krain ES uzajemadziejańnie na dvuchbakovym uzroŭni i pa linii Biełaruś‑ES.
***
22 listapada ŭ Kijevie kiraŭniki MZS Ukrainy, Biełarusi i Litvy na sustrečy ŭ Brusieli damovilisia pieradać Jeŭrakamisii sumiesny list, u dadatku da jakoha buduć pieraličanyja «kankretnyja prajektnyja prapanovy» adnosna palityki «Uschodniaje partniorstva».
Ministry zajavili ab važnaści supracoŭnictva ŭ transpartnaj śfiery ŭ ramkach «Płatformy 2». Havorka, u pryvatnaści, idzie ab prajektach ciahnika kambinavanych pieravozak «Vikinh», aŭtamahistrali Vilnius — Minsk — Kijeŭ, spraščeńnia pracedur pierasiačeńnia miežaŭ, stvareńnia łahistyčnych sietak dla pavyšeńnia efiektyŭnaści funkcyjanavańnia transpartnaha kalidora pamiž Bałtyjskim i Čornym marami. Baki adznačyli, što patencyjał hetych prajektaŭ moža značna ŭzraści ŭ vypadku pašyreńnia ich hieahrafičnych miežaŭ u napramku Turcyi, Paŭnočnaha Kaŭkaza, Centralnaj Azii i Skandynavii.
U śfiery ahulnaj kulturnaj i histaryčnaj spadčyny ministry damovilisia «sadziejničać naładžvańniu niepasrednych kantaktaŭ pamiž upaŭnavažanymi strukturami, uklučajučy stvareńnie trochbakovaj rabočaj hrupy, u funkcyi jakoj uvachodzili b pytańni kaardynacyi supracoŭnictva ŭ hetaj śfiery».
Kiraŭniki zamiežnapalityčnych viedamstvaŭ «zhadzilisia vyvučyć mahčymaść sumiesnaha śviatkavańnia 600‑j hadaviny Hrunvaldskaj bitvy i stvareńnia mižnarodnaha forumu ekśpiertaŭ‑daśledčykaŭ histaryčnaj spadčyny».
Jak paviedamlajuć ukrainskija ŚMI, čakajecca, što na sustrečy budzie prezientavany trochbakovy prajekt Biełarusi, Litvy i Ukrainy pa abuładkavańni miažy. Akramia taho, mohuć być abjaŭleny pieršyja zaćvierdžanyja prajekty.
U palityku «Uschodniaje partniorstva» uvachodziać 27 krain ES, a taksama Azierbajdžan, Armienija, Biełaruś, Hruzija, Małdova i Ukraina. Prahrama startavała 7 maja 2009 hoda.
