Na sustrečy biełaruskich žurnalistaŭ z pradstaŭnikami pasolstva Biełarusi ŭ Bruseli Alaksandram Samusienkam i Alaksiejem Samasujevym było zadadziena pytańnie nakont adličeńniapres-sakratarki «Maładoha frontu» Taćciany Šapućki ź Biełaruskaha dziaržaŭnaha univiersiteta za ŭdzieł u Forumie hramadzianskaj supolnaści.
Alaksandr Samusienka admoviŭsia kamientavać padzieju, ale zastupiŭsia za kiraŭnika Fiederacyi prafsajuzaŭ Biełarusi Leanida Kozika.
«Mnie patrapiŭsia ŭ presie artykuł pra toje, što spadar Kozik nibyta źbiraŭsia arhanizavać mitynh u padtrymku Taćciany Šapućka, — skazaŭ Samusienka. — Ja razmaŭlaŭ sa spadarom Kozikam u miežach Forumu hramadzianskaj supolnaści i jon mianie ŭpeŭniŭ, što ničoha padobnaha nie abiacaŭ, tamu heta, napeŭna, tyčycca pytańnia pra čystatu pieradačy infarmacyi ŚMI.
U svaju čarhu Volha Stužynskaja, pradstaŭnica Ofisa «Za demakratyčnuju Biełaruś», jakaja taksama prysutničała na sustrečy, abvierhła hetyja słovy.
«Spadar Kozik nasamreč zrabiŭ takuju zajavu padčas Forumu. Ja dumaju, što abvinavačvać srodki masavaj infarmacyi ŭ dadzienaj situacyi nie zusim słušna», — skazała jana.
Stužynskaja taksama paabiacała prykłaści ŭsie namahnańni, kab jeŭrapiejskaja supolnaść daviedałasia pra adličeńnie Taćciany Šapućki.
«Ja dumaju što Respublika Biełaruś, jakaja padpisałasia pad poŭnym pakietam svajho ŭdziełu va prahramie Uschodniaha partniorstva pavinna strymać svaje abiacańni», — dadała jana.
