Krytyčny vodhuk žurnalista «Biełhaziety» na «vystavu ŭsich» pryvioŭ da prablemaŭ na pracy ŭ kuratara vystavy pacyjentaŭ psichijatryčnaj kliniki. Važkaje žurnalisckaje słova pryviało da pahrozy zvalnieńnia Darji Jaskievič.
Pra adkryćcio «vystavy ŭsich» pisali mnohija ŚMI.
Nasamreč adbyłasia niezvyčajnaja padzieja, navat dla staličnaj publiki —14 listapada ŭ Respublikanskim teatry biełaruskaj dramaturhii prajšła vystava mastakoŭ psichanieŭrałahičnaha internata №3 (Navinki). Śviet pabačyła mastactva, jakoje zvyčajna isnuje za ścienami režymnaha abjekta.
Adnak biełaruskaja błohaśfiera padniałasia na vušy litaralna na hetym tydni z pryčyny i nastupstvaŭ artykuła «Biełhaziety» «Šyza-paci». Aŭtar publikacyi, Maksim Ivaščanka, admoŭna adhuknuŭsia pra vystavu, što pryviało za prablemaŭ na pracy ŭ kuratara vystavy Darji Jaskievič.
«Ja daŭno supracoŭničaju ź psichanieŭrałahičnym internatam №3. Čatyry z pałovaj hady była ŭ ich vałancioram. Potym mianie ŭziali na staŭku.
Usio było bolš‑mienš dobra. Raniej my znachodzili kampramisy», - kaža Darja Jaskievič.
Paśla «vystavy ŭsich» ja nie adsočvała, što piša pra nas presa. Heta było niavažna. Mnie pazvanili znajomyja, skazali, što «Biełhazieta» nadrukavała drenny vodhuk. Pieršaja reakcyja była: nu napisali i napisali, što tut zrobiš. A potym hazietu prynieśli sami žychary internata. Ja pračytała i ŭ mianie vałasy na hałavie ŭstali. Ja damoviłasia z aŭtaram artykuła na sustreču, vykazała jamu što dumaju. Maksim Ivaščanka źlohku vybačyŭsia pierada mnoju (nie ad imia redakcyi, a jak pryvatnaja asoba). Na hetym usio mahło b i skončycca.
Adnak mianie vyklikali da kiraŭnictva internatu i skazali, što ja ich padviała i ciapier my budziem razmaŭlać pra inšyja formy supracoŭnictva. Skazali, što mianie, chutčej za ŭsio, zvolniać i prajekty zakryjuć. Usio pavinna vyrašycca paśla 17 śniežnia, zaraz ja znachodžusia ŭ adpačynku.
Cikava, što na stanoŭčyja vodhuki pra vystavu kiraŭnictva psichanieŭrałahičnaha centra nie adreahavała.
Žurnalist Maksim Ivaščanka nie kamientuje ŭłasny artykuł i jaho nastupstvy.Ci adkazvaje jon za nastupstvy źjedlivych słovaŭ? I što, ciapier drennych vodhukaŭ pisać nielha, a raptam kamu nie spadabajucca?
