Siońnia ździvić čarhovym fotaalbomam pra Biełaruś, zdavałasia b, užo niemahčyma. Fotamastaku Siarhieju Płytkieviču heta ŭdałosia. Jahonaja novaja kniha tak i nazyvajecca – «Niečakanaja Biełaruś». «Niečakanaja» – tamu, što naša kraina pradstaŭlena ŭ joj u vielmi niazvykłym rakursie – z vyšyni ptušynaha palotu.
Bolš za sto hadzin pravioŭ u niebie Siarhiej Płytkievič dziela taho, kab potym na 240 staronkach svaimi fotazdymkami raskazać pra pryhažość biełaruskaj ziamli. Za dva hady fotamastak ździejśniŭ 36 palotaŭ na samalotach i viertalotach. Darečy, zastali my jaho jakraz u toj čas, kali jon čakaŭ čarhovaha vyletu dla zdymak dla svajho nastupnaha vydańnia.
– Mnie vielmi chočacca pakazać Biełaruś va ŭsioj jaje niezvyčajnaj pryhažości, abudzić pačućcio honaru za našu ziamlu, – raskazaŭ karespandentu «Salidarnaści» Siarhiej Płytkievič. – Pa-ščyraści, padčas pracy mnohija miaściny ja sam raskryvaŭ dla siabie nanoŭ. Toj ža pałac Sapiehaŭ u Ružanach ź ziamli ŭražvaje zusim nie tak, jak z vyšyni palotu. Albo, da prykładu, vioska Miory. Kolki razoŭ davodziłasia jechać praź jaje – vioska jak vioska. A jak pahladzieć źvierchu – prosta cud.
Jak pryznaŭsia fotamastak, rabić zdymki ŭ takich niepryvyčnych umovach značna ciažej. Asabliva ŭzimku. Ale ź ciaham času Siarhiej nabiŭ ruku – ciapier toje, na što raniej hublałasia nie mienš za try hadziny, zaraz jon zaprasta zdymie za hadzinu.
U albomie Siarhieja Płytkieviča fotavandroŭka pa Biełarusi pačynajecca z Brasłaŭskich azioraŭ, kaniečny ž punkt prybyćcia – Minsk. Siarod takich znakavych dla Biełarusi miaścin, jak Mirski zamak, Niaśviž abo Połack, sustrakajucca i zusim małaviadomyja kutki.
– Mnie chaciełasia taksama pakazać miaściny, tak by mović, nieraskručany, nieznajomyja, – kaža Płytkievič. – Naprykaład, na Saračanskich aziorach jość prosta niezvyčajnaje voziera Hałubina. Źvierchu jano i sapraŭdy nahadvaje hołuba. Jość voziera ŭ vyhladzie žuraŭla… Na žal, daloka nie ŭsio jašče z taho, što chacieŭ, zmoh źniać: vielmi mnoha patrebna roznaha kštałtu papierak i dazvołaŭ.
Fotaalbom «Niečakanaja Biełaruś» užo pastupiŭ u prodaž, kniha kaštuje kala 49 tysiač rubloŭ.
