Z 24 śniežnia 2009 hoda pa 8 studzienia 2010 hoda orhany ŭnutranych spraŭ Biełarusi buduć nieści słužbu va ŭzmocnienym režymie.
Pra heta paviedamiŭ pieršy namieśnik načalnika hałoŭnaha ŭpraŭleńnia achovy pravaparadku i prafiłaktyki MUS Alaksandr Barsukoŭ na pres‑kanfierencyi ŭ Minsku 15 śniežnia.
Pavodle jaho słoŭ, u zabieśpiačeńni pravaparadku ŭ navahodnija śviaty płanujecca zadziejničać pryblizna 10 tysiač supracoŭnikaŭ orhanaŭ unutranych spraŭ i vajennasłužačych unutranych vojskaŭ, u tym liku ŭ Minsku — prykładna try tysiačy.
Pad asablivy kantrol buduć uziaty miescy praviadzieńnia masavych mierapryjemstvaŭ. Jany buduć aharodžany turnikietami, abśledavany piratechničnymi hrupami.
Ahlad pry prachodžańni na aharodžanyja terytoryi budzie ažyćciaŭlacca ručnymi i stacyjanarnymi mietaładetektarami.
Siarod asnoŭnych miescaŭ praviadzieńnia śviat u Minsku — Kastryčnickaja płošča i terytoryja kala steły «Minsk — horad‑hieroj». Fiejervierk blizu steły pačniecca 1 studzienia ŭ 1.30.
Prapuskać hledačoŭ na jaho płanujecca praz vosiem KPP.
Na Kastryčnickaj płoščy ŭ navahodniuju noč buduć pracavać prykładna 2.300 supracoŭnikaŭ milicyi ŭ formie i prykładna 100 — u cyvilnym adzieńni. Hetaja płošča, jak i inšyja miescy masavych mierapryjemstvaŭ, budzie znachodzicca pad videanazirańniem. Infarmacyja budzie pastupać u štab u MUS.
Barsukoŭ paviedamiŭ, što tradycyjna prodaž śpirtnoha ŭ miescach praviadzieńnia masavych mierapryjemstvaŭ i ŭ radyusie 500 mietraŭ ad ich budzie zabaronieny za dźvie hadziny da pačatku śviatkavańnia.
Akramia taho, milicyja prapanuje ŭ navahodniuju noč paśla 21.00 zabaranić prodaž śpirtnoha ŭ kruhłasutačnych kramach.
Barsukoŭ paviedamiŭ, što napiaredadni śviataŭ pravaachoŭnyja orhany aktyvizavali pracu pa kanfiskacyi vadkaści z utrymańniem śpirtu, naprykład ačyščalnikaŭ škła, jakija kantrabandysty sprabujuć uvozić u Biełaruś. Z abarotu vyklučana ŭžo 1 młn. 606 ton takoj pradukcyi.
Akramia taho, užo kanfiskavana bolš jak 1,7 młn. adzinak piratechniki (za apošnija paŭtara miesiacy 2008 hoda — 480 tys.).
Jak paviedamiŭ načalnik adździeła arhanizacyi miedycynskaj achovy pry nadzvyčajnych situacyjach Ministerstva achovy zdaroŭja Aleh Pančuk, u noč z 31 śniežnia 2008 hoda na 1 studzienia 2009 hoda ŭ miedycynskija ŭstanovy z roznymi traŭmami ŭ vyniku vykarystańnia piratechniki źviarnulisia 56 čałaviek.