Za hety hod «Lapis» atrymaŭ «rok‑karonu», vybuchnuli The Toobes, «Hluki» sabralisia pad novaj nazvaj… I tolki N.R.M. maŭčali.
U kancy 1990‑ch N.R.M. byŭ našym usim. Hurt zdoleŭ tady pryciahnuć da biełaruskaj kultury cełaje pakaleńnie moładzi. Ich pieśni byli muzykaj šmattysiačnych mitynhaŭ pratestu. Ich uźlot pačaŭsia ŭ 1996‑m, kali na «Rok‑karanacyi», zamiest zapłanavanaj falkłornaj «Mieła mamka try synočki», muzyki ŭ sałamianych brylach niečakana ŭrezali «Partyzanskuju». Što zdaryłasia paśla? Čamu ciapier tak redka čuvać N.R.M.?
Muzyčnyja analityki sajta «Experty.by» navat skłali hrafik karjery hurta. Na ich dumku, z 2000 hoda, paśla vychadu alboma «Try čarapachi», u tvorčaści N.R.M. nazirajecca kryzis. Frontmen hurta Lavon Volski nie zhodny. «Hurt doŭha zajmaŭ najvyšejšyja pazicyi. Było vyrašana ŭziać paŭzu. A ciapier my viartajemsia», — kaža muzyka.
Ale ci stanie toje viartańnie viartańniem karala? Siońnia, kali ŭ płejerach moładzi hučać «Belarus Freedom» i «Ružovyja akulary» ad «Lapisa Trubiackoha».
Za apošni hod hurt Siarhieja Michałka atrymaŭ šerah uznaharod, vystupiŭ u ZŠA, prezientavaŭ albom «Kultpraśviet». «Vybuchnuła» maładaja kamanda The Toobes, jakuju vykazaŭ žadańnie pradusavać brytanski muzyka Tricky. Udzielniki mahiloŭskich «Hlukaŭ» sabrali novy hurt Akute… I tolki N.R.M. maŭčali.
Siońnia prablema N.R.M. u tym, što hurt nie moža pašyryć svaju aŭdytoryju, u adroźnieńni ad «lapisaŭ», ličyć muzyčny ahladalnik Siarhiej Budkin. U časy najvyšejšaha svajho ŭźlotu N.R.M. ihrali muzyku zmahańnia i supraćstajańnia. Ale siońnia jana mienš zapatrabavanaja. Apošnim takim tvoram stała pieśnia «Hadziučnik», jakaja vybuchnuła ŭ 2006‑m, padčas prezidenckaj kampanii. Muzyki i sami byli z moładździu na Płoščy, śpiavali ŭ maroz u namiotavym haradku «ŭsio roŭna my pieramožam, bo inačaj być prosta nie moža!»
«Ja liču, paśla albomaŭ «Try čarapachi» i «Dom kultury» spad u tvorčaści jość, — kaža muzyčny krytyk Źmicier Padbiarezski. — Muzyki pačali razychodzicca, stvaryŭšy svaje pabočnyja prajekty». Lavon Volski vypuskaje postmadernisckija solnyja albomy, Pit Paŭłaŭ stvaryŭ hurty «Harackija» i Pete Paff, dzie robić muzyku, mocna adroznuju ad «eneremaŭskaj».
I ŭsio ž prychilnikaŭ u N.R.M. jašče kudy bolej, čym u inšych. Siońnia ich viedaje kožny słuchač rok‑muzyki (niaredka hetyja ramki šyrejšyja). Narodnymi stali «Pieśnia pra kachańnie», «Pavietrany šar», «Try čarapachi». Pačatkoŭcy vučacca na pieśniach N.R.M. Niekatorym tak i nie ŭdajecca vyjści z‑pad jaho ŭpłyvu.
Čamu nie «Niejra Dziubiel», nie «Krama», a mienavita N.R.M. staŭ simvałam biełaruskaha roku kanca XX stahodździa? «Unutrany nastroj muzykaŭ supaŭ z tym, što było navokał. N.R.M. akazaŭsia svoječasovaj kamandaj», — ličyć Źmicier Padbiarezski.
Ale jość vybuch, a paśla nastupaje maŭčańnie. Albo kamanda i ŭvohule raspadajecca, syšoŭšy ź viaršyniaŭ słavy. N.R.M. pieratryvaŭ usio. Voś tolki čas nie paškadavaŭ «mrojaŭcaŭ». Kaštoŭnaści źmianiajucca. Dy i śvietapohlady samich muzykaŭ taksama. Zaraz jany nie zmohuć dazvolić sabie vychad na scenu hołymi, jak toje było na adnoj z «Rok‑karanacyj». Takija ŭčynki adychodziać u minułaje. Hurt znachodzicca na parozie źmienaŭ. I nie dziŭna, kali novy albom N.R.M. budzie liryčnym, ź pieśniami kštałtu «Prostyja słovy», «Lepiej nie budzie», «Pakul nie pačniecca vajna», miarkuje Z.Padbiarezski.
Ci tak heta — pabačym na «Kaladnym kancercie». Śniežański vystup pakaža, u jakaści kaho N.R.M. viartajecca.
«Vialiki akustyčny kaladny kancert» hurta N.R.M.projdzie 17 śniežnia ŭ KZ «Minsk» (vuł.Kastryčnickaja, 5).
Heta budzie pieršy vystup u Biełarusi paśla praciahłaha maŭčańnia. Pačatak u 19.00.
