Viera Ryč padčas naviedvańnia redakcyi NN u krasaviku 2007 hoda. Zdymak Andreja Lankieviča.
Jaje pieršy pierakład na anhielskuju ź biełaruskaj movy byŭ nadrukavany ŭ miunchienskaj haziecie «Baćkaŭščyna» ŭ 1957 hodzie. V.Ryč pierakłała Kupału, Kołasa, Arsieńnievu, Bahdanoviča, Haruna, Ciotku, Hienijuš, Biadulu, Krapivu, Ipatavu, Hileviča dy inšych.
Jana naradziłasia 24 krasavika 1936 hoda ŭ Łondanie. U 1960 hodzie vyjšaŭ jaje pieršy zbornik paezii «Outlines» («Abrysy»). U 1963 hodzie vyjšaŭ jaje druhi zbornik vieršaŭ «Portents and Images» («Znaki j vobrazy»).
U 1969 hodzie časopis «Nature» prapanavaŭ Viery Ryč pracavać karespandentam pa Ŭschodniaj Jeŭropie dy SSSR. U Biełaruś jana trapiła tolki ŭ 1991 hodzie. Paśla jana pryjazdžała ŭ Biełaruś raz na hod ci paŭhoda.
U 1971 hodzie pad patranatam JUNESKA vyjšła pieršaja ŭ śviecie antałohija biełaruskaj paezii na zachodniaj movie «Like Water, Like Fire: An Anthology of Byelorussian Poetry from 1828 to the Present Day» («Jak vada, jak ahoń: Antałohija biełaruskaje paezii ad 1828 hoda da sučasnaści»).Ale ŭ Savieckim Sajuzie z pryčyny niepalitkarektnaści hetu knihu vydalili z prodažu. U 1977 hodzie vyjšaŭ pierakład «Tarasa na Parnasie» (pierakłali Viera Ryč dy Arnold Makmilin).
U 2004 hodzie vyjšaŭ novy zbornik biełaruskaj paezii ŭ pierakładzie Viery Ryč «Poems on Liberty: Reflections for Belarus» («Vieršy na Svabodu: Rozdumy pra Biełaruś»).
U 1970—1990 hady Viera Ryč ščylnaja supracoŭničała z demakratyčnymi ruchami i ruchami ŭ abaronu pravoŭ čałavieka u Savieckim Sajuzie. Pracavała ŭ Polščy («Salidarnaść») i Vienhryi.
Siarod jaje ŭznaharodaŭ — premija imia Ivana Franka (u honar 40 hadovaha słužeńnia ŭkrainskaj litaratury). Viera Ryč pracavała nad pierakładam «Novaj Ziamli» Jakuba Kołasa.