Nadoječy Biełaruski dziaržaŭny ŭniversytet padpisaŭ damovu ab supracy ź iranskim Volnym isłamskim universytetam. Sam status viadučaj VNU našaj krainy prymušaje jaje trymacca peŭnaha vysokaha ŭzroŭniu, vybirajučy ź kim pracavać.
Tamu možna było čakać, što BDU budzie macavać kantakty z sapraŭdy aŭtarytetnymi i suśvietna viadomymi iranskimi ŭniversytetami, u pryvatnaści z Tehieranskim universytetam, Universytetam Amir‑Kiabir ci chacia b Universytetam Alameje Tabatabai. Hetyja VNU nasamreč blizkija da klasyčnaha razumieńnia ŭniversyteta i ŭniversyteckaj adukacyi, prynamsi pa navukovym ŭzroŭni i akademičnych svabodach jany mohuć jašče być uzoram dla našych ustanovaŭ vyšejšaj adukacyi.
Ale niedziaržaŭny «Volny isłamski ŭniversytet» vybitny vyklučna svaimi pamierami — sotni tysiačaŭ studentaŭ u dziasiatkach filijaŭ pa ŭsim Iranie.
Praściej kažučy, takaja sabie kanvejernaja kuźnica dyplomaŭ. Vučycca ŭ hetym «danešhach‑e azad» dla irancaŭ nieprestyžna — heta zaŭždy apošniaje vyjście dla niebaraki, jaki nia trapiŭ u inšuju VNU. Lišnie kazać, što akademičny dy navukovy ŭzrovień hetaj kantory nievysoki. Mižnarodny aŭtarytet — taksama.
Naŭrad ci kiraŭnictva BDU viedała pra hetuju specyfiku i toje, što ich novaja partnerskaja instytucyja prosta nia maje mahčymaściaŭ dla deklaravanych prajektaŭ i daśledavańniaŭ. Zrešty, jak i ŭ vypadku niekatorych inšych hučnych biełaruska‑iranskich inicyjatyvaŭ, asnovaj novaj damovy ź biełaruskaha boku mahło być prostaje žadańnie «vyciahnuć» hrošy z zamiežnych partneraŭ, a nia ŭzvažany krok da stratehičnaha raźvićcia ŭłasnaha patencyjału.
Miž tym, hetaki hrašova‑aryjentavany padychod užo maje svaje admoŭnyja nastupstvy ŭ biełaruska‑iranskich stasunkach. Zachaplajučysia perspektyvami novaj biełaruska‑iranskaj inicyjatyvy, dziaržaŭnyja ŚMI saramliva pryznalisia, što kolkaść iranskich studentaŭ (tak žadanych nami hrošapłacielščykaŭ) u Biełarusi skaračajecca, ale pramaŭčali, čamu heta adbyvajecca.
Hałoŭnaja pryčyna — heta toje, što iranski bok uvioŭ hruntoŭny ispyt dla vypusknikoŭ taho ž samaha mienskaha meduniversytetu.
Jak rastłumačyli studenty, jakich heta zakranuła, źviazana heta było ŭ pryvatnaści z padozrańniami nakont taho, ci sapraŭdy vučylisia čamu studenty, jakija prabavili ŭ Biełarusi kolki hod i farmalna atrymali dyplom — padazravać toje prymušaŭ iranskaje ministerstva sam uzrovień vałodańnia niekatorych hetych hora‑medykaŭ rasiejskaj movaj. Postsavieckija krainy viadomyja ŭ Iranie jakraz tym, što kab skončyć tamtejšy ŭniver dastatkova svoječasova płacić VNU hrošy, a tamu naprykład Iran nie pryznaje nijakich dyplomaŭ, vydavanych u niekatorych byłych savieckich respublikach, jak to va Ŭzbekistanie. Niejki čas Biełaruś była na niebłahim rachunku i iranskim bokam pryznavalisia dyplomy cełaha šerahu našych VNU. Ale, praŭdapadobna, biełarusy pra svaju reputacyju dbajuć mała dyj rupiacca tolki pra hrošy.
