Tušonki, škarpetki i miod suprać žyvapisu, hrafiki dy skulptury. Fotarepartaž z Pałacu mastactvaŭ na Kazłova, 3.
Dźvie vystavy ŭ Pałacy.
Navahodni kirmaš sustrakaje knihami.
Pradukcyja Aršanskaha miasakambinata. «Kupi niam-niam! Dobra vam, dobra i nam»
Miod tajožny...
...baškirski
...zapaviedny
...i biełaruski.
Ciopłyja rečy — chadavy tavar.
Na vystavie «Kaladny fest» pusta.
U Pałacy mastactvaŭ, što na Kazłova, 3, ad 23 śniežnia pracujuć dźvie vystavy — 3-ja respublikanskaja mastackaja vystava «Kaladny fest», a taksama vystava padarunkaŭ i suvieniraŭ «Navahodni kirmaš». Na pieršaj vystavie akramia žyvapisu, hrafiki dy skulptury pradstaŭlenyja mižnarodny prajekt «Połacki abiareh» i sacyjalna-mastacki prajekt fotamastački Viktoryi Janučkoŭskaj «Śviet kazačnych vobrazaŭ» — zdymki maleńkich žycharoŭ baraŭlanskaha dziciačaha chośpisu. Ludziej tut u pieršaj pałovie dnia niama. Tolki sumnaja biez naviednikaŭ kantralorka na druhim paviersie vystavačnaj zali, jakaja strohim hołasam papiaredžvaje: «Małady čałaviek, siudy ŭvachod płatny!» Paviercham nižej, kala łatkoŭ z navahodnimi tavarami, ludziej nie brakuje. Idu tudy, kab vyśvietlić, što ž tam pradajuć takoje, što całkam adciahnuła ŭvahu ludskuju ad mastactva. Navahodni kirmaš sustrakaje knihami «Śpis ziemleŭładalnikaŭ Mienskaha pavieta» dy «Historyjahrafija hienieałohii Biełarusi (Ch –XXI stst.)» Alaksandra Zalivaki, jakija lažać na stale pobač z karalami dy suvienirami. Z knižnaj pradukcyi na kirmašy sustrakajecca pravasłaŭnaja litaratura, a taksama navahodnija dziciačyja vydańni.
«Pradukcyja aršanskaha miasakambinata! Padychodźcie, nabyvajcie — nie paškadujecie!» — zazyvajuć pradavački. Pabačyŭšy fotaaparat, pytajuć ź jakoj ja haziety. «A to fatahrafujuć druhi dzień, a ja siabie jašče nidzie nie bačyła», — skardzicca adna. «Pradajom sa źnižkaj — u kramie hetaja tušonka 12 tysiač, u nas 10», — zaprašaje nabyć blašanačku ciotka i dadaje vieršykam: «Kupi niam-niam! Dobra vam, dobra i nam». Pobač handlujuć miodam samych roznych hatunkaŭ i pachodžańnia — baškirskim, tajožnym i navat zapaviednym miodam poŭdnia Rasii. Pradaŭcy va ŭsie sposaby rekłamujuć burštynavy pradukt: handlary baškirskim miodam apranuli plušavyja šapački ŭ vyhladzie pčoł, tajožny miod pradaje dziaŭčyna ŭ švedry ŭ aranžava-čornuju pałosku. I tolki pradaviec biełaruskaha miodu navat nie ŭstaje z kresła pry nabližeńni patencyjnych pakupnikoŭ.
Viazanyja z voŭny rečy — škarpetki, šaliki i chustki — jašče adzin papularny tavar na vystavie. Chutkaja kapitulacyja marazoŭ vidavočna nie škodzić handlu.
***
«Kaladny fest» u Pałacy mastactvaŭ pracuje z 23 śniežnia 2009 pa 17 studzienia 2010 hoda. Navahodni kirmaš – da 31 śniežnia z 10 da 19.
