Słavuty ŭ minułym biełaruski spartsmien, trochrazovy alimpijski čempijon pa viesłavańni na bajdarkach i kanoe, kiraŭnik deputackaj hrupy «Respublika» ŭ Uładzimir Parfianovič zajaviŭ, što paśla navahodnich śviataŭ źjazdžaje pracavać u štabie nacyjanalnaj rasijskaj zbornaj pa viesłavańni na bajdarkach i kanoe.
— Sapraŭdy ja budu pracavać u rasijskaj zbornaj pa viesłavańni na bajdarkach i kanoe, — raspaviadaje Uładzimir Parfianovič. — Budu adkazvać za ŭsie nacyjanalnyja kamandy.
— Jak pastupiła prapanova i kali?
— Zaprasili ŭ hetym miesiacy. Usio było ŭzhodniena, na kanfierencyi Fiederacyi viesłavańnia Rasii była prapanavana maja kandydatura. Nichto nie piarečyŭ.
— Umovy zadavalniajuć?
— Biezumoŭna. U mianie adkryty kaštarys, mahu lacieć u luby punkt Rasii na lubyja spabornictvy, kab akazvać dapamohu nie tolki nacyjanalnym kamandam, ale i spartyŭnym centram. U Biełarusi ž mnie miesca nie znajšłosia. A kavałak chleba treba šukać. Jeści ž treba niešta.
— Praca pastajanna ŭ raźjezdami?
— U hetym jana i budzie zaklučacca — lotać ad Uładzivastoka da Kalininhrada. I ad Amieryki da Jeŭropy.
— Atrymlivajecca, što — budziecie treniravać kankurentaŭ biełaruskaj zbornaj?
— U Biełarusi zastajucca ŭsie maje siabry i ŭ nacyjanalnaj kamandzie, i ŭ Fiederacyi … A kankurentami spartsmieny stanoviacca, tolki kali vychodziać na darožku. Ale ja ŭ luby momant mahu dapamahčy i našaj zbornaj, kali paprosiać dapamohi abo savieta.
— Kantrakt ŭžo padpisany?
— Nie, jon budzie padpisany adrazu ž paśla śviataŭ. Pakul jašče nie viedaju, na jaki termin, ale, dumaju, što da Alimpijskich hulniaŭ budu pracavać dakładna.
