Kampanija Iran Khodro, što vypuskaje aŭtamabili «samand», była zasnavanaja ŭ 1962 h. Jakraz u hety čas u Iranie adbyvałasia Biełaja revalucyja, i šah rabiŭ zachady, kab madernizavać ekanomiku krainy. U tym liku i ŭ zasnavańni aŭtapramysłovaści.
U 1967 h. na zavodzie byŭ vypuščany pieršy iranski aŭtamabil – «pejkan». Znajomy, jaki nie adzin miesiac pravioŭ u Iranie, kaža, što «pejkan» – heta analah ukrainskaha «Zaparožca». Z usimi nastupstvami.
U 1990-ja na zavodach Iran Khodro była naładžana vytvorčaść aŭtamabilaŭ «pežo» – madelaŭ 1 600, 205, 405. Madel «Pežo-405» i była ŭziataja za asnovu aŭtamabilaŭ «samand». U pierakładzie z farsi – samand značyć «skakun». Pieršy aŭtamabil syšoŭ z kanvejeru ŭ 2000 h.
Aŭtamabili «samand» karystajucca ŭ Iranie šalonaj papularnaściu – na dolu pradpryjemstvaŭ kampanii Iran Khodro prychodzicca 70% iranskaha rynku.
Takaja papularnaść tłumačycca dvuma rečami. U Iranie vielmi vialikija – Biełaruś nie idzie ni ŭ jakoje paraŭnańnie – myty na zamiežnyja aŭtamabili. Kupić inšamarki tam amal niemahčyma. Aproč taho, pa biaskrajnich iranskich prastorach poŭzaje vialikaja kolkaść abrydłych «pejkanaŭ», jakija kaštujuć kala 6 tys. dalaraŭ. Vy možacie addać takija hrošy za «Zaparožac» ci «Žyhuli»? I irancy nie žadajuć. Tamu i nabyvajuć zrobleny pa eŭrapiejskich lekałach «samand» z načyńniem ad «pežo», nie škadujučy 12,5 tys. dalaraŭ. U paraŭnańni z «pejkanam» heta vielmi tanna. Dla Iranu.
Ale dla biełaruskaha spažyŭca «Samand LX» – hetaja madel budzie ŭ nas źbiracca – vyhladaje katom u miachu. Hetaj cenasnaj katehoryi, zaznačajuć eksperty, adpaviadajuć «Reno Lohan» i «Ford Fokus».
Ale i «reno», i «ford» – raskručanyja brendy, i majučy ŭ kišeni 12,5 tys. dalaraŭ, pakupnik zadumajecca: addać pieravahu iranskamu ci niamieckamu aŭtamabilu?
Da kanca hodu ŭ Biełarusi miarkujecca sabrać 800–820 aŭtamabilaŭ, u nastupnym hodzie – 4–6 tys. (u Iranie vypuskajecca 500 tys. u hod). Pradavać miarkujuć 3–5 tys. aŭtamabilaŭ u hod, tym samym advajavaŭšy 20–25% rynku novych aŭtamabilaŭ. U hetuju ličbu ciažka vierycca. Kali tolki nie zadziejničać tradycyjny dziaržresurs: pierasadzić čynoŭnikaŭ i milicyju na «samandy».
«Biełhazieta» vykazała dumku, što iranskija aŭtamabili prapanujuć dziaržaŭnym taksaparkam, inšym taksafirmam pa speccanie i z padoŭžanaj haranatyjaj. Ciapier jana składaje 2 hady i 60 tys. kilametraŭ prabiehu.
Dy ci nia zhorniecca iranski prajekt praz paŭhodu? Kanuŭ u niabyt prajekt pabudovy Iranam celuloznaha zavodu, pra jaki ŭžo nichto nia zhadvaje. Niepradkazalnyja hetyja irancy. Zrešty, jak niepradkazalnyja biełarusy. Prahnali «ford» z Abčaku. Pamianiajecca vektar palityki, mo i «samand» stanie nie patrebnym.
