Vosiem kamand voźmuć udzieł u VI kaladnym mižnarodnym turniry amataraŭ chakieja na pryz prezidenta Biełarusi.
Spabornictvy projduć z 4 pa 7 studzienia na dźviuch minskich arenach — u Pałacy sportu i Ladovym pałacy, paviedamiŭ ministr sportu i turyzmu Aleh Kačan na pres‑kanfierencyi 3 studzienia. U hrupie A zhulajuć zbornyja Ukrainy, Słavakii, Šviejcaryi i Biełarusi, u hrupie V — Rasija, Finlandyja, Hiermanija i Kanada. Paśla adnakruhavoha turniru adbuducca matčy za pieršaje i treciaje miescy.
Biełaruś budzie pradstaŭlać kamanda Alaksandra Łukašenki, kudy ŭvachodziać taksama dva jaho syny Viktar i Dźmitryj, hałoŭny trenier chakiejnaj zbornaj Michaił Zacharaŭ, viadomyja hulcy Uładzimir Kopać, Uładzimir Cypłakoŭ, Aleh Chmyl, Aleh Ramanaŭ i inš.
Pavodle słoŭ Kačana, čakajecca, što Łukašenka‑starejšy vyjdzie na lod va ŭsich matčach.
U składzie inšych zbornych zhulajuć byłyja prafiesijanały, u tym liku tyja, chto maje vopyt vystupleńnia ŭ NCHŁ. Rasiju pradstavić kamanda «Hazprom ekspart», jakaja ŭ 2007 hodzie vyjhrała hetyja spabornictvy (u astatnija hady pieramahała kamanda Łukašenki). Samamu starejšamu ŭdzielniku turniru — niemcu Eduardu Bšajdu — spoŭniłasia 77 hadoŭ.
Jak adznačyŭ ministr, haspadary majuć namier znoŭ vyjhrać turnir, adnak zrabić heta budzie niaprosta. Takoje ž mierkavańnie vykazaŭ hienieralny sakratar Fiederacyi chakieja Siarhiej Hančaroŭ. Jon pradstaŭlaŭ FCHRB u adsutnaść jaje staršyni Uładzimira Navumava, jakoha nie było taksama 1 studzienia ŭ Nacyjanalnym aeraporcie «Minsk» padčas sustrečy minskaha «Dynama», jakoje viarnułasia sa Šviejcaryi ź pieramohaj na Kubku Špienhlera.
Uvachod na hulni svabodny.
Pry hetym Kačan nie bačyć ničoha kiepskaha ŭ arhanizavanym naviedvańni matčaŭ navučencami spartyŭnych škoł, jakim, na jaho dumku, budzie cikava pahladzieć na niadaŭnich kumiraŭ.
