U Biełarusi adsutničaje jaŭnaja nieabchodnaść u dalejšaj značnaj karekciroŭcy valutnych kursaŭ, choć nievialikaja karekcyja moža być abhruntavanaja.
Pra heta havorycca ŭ abnarodavanym 16 studzienia dakładzie Mižnarodnaha valutnaha fondu (MVF) pa asobnych pytańniach ekanomiki Biełarusi.
U dakumiencie, padrychtavanym Jeŭrapiejskim departamientam MVF, analityki pryjšli da zaklučeńnia ab tym, što istotnaja niezbałansavanaść u valutnaj palitycy Biełarusi, jakaja nazirałasia ŭ kancy 2008 hoda,
była ŭ asnoŭnym urehulavana.
U studzieni 2009 hoda ŭłady praviali devalvacyju i pierajšli da vykarystańnia miechanizmu pryviazki kursu da košyka valut (rasijski rubiel, dołar ZŠA i jeŭra), ale nacisk na valutny kurs zachavaŭsia.
MVF kanstatuje, što ŭ pieršyja piać miesiacaŭ 2009 hoda biełaruski ekspart skaraciŭsia amal na 50%, tady jak impart źmienšyŭsia tolki na 30%, u vyniku čaho deficyt pa kolkaści najaŭnych apieracyj staŭ amal u dva razy bolšy, čym u adpaviedny pieryjad 2008 hoda. Aprača taho, nacisk na reziervy uzmcniaŭsia značnym popytam na valutu, abumoŭlenym tym, što nasielnictva čakała novaj devalvacyi. Uličvajučy źmienšanyja pastupleńni, Nacbank Biełarusi padtrymlivaŭ valutny kurs, pravodziačy značnyja interviencyi — u pamiery zvyš 1,1 młrd. dołaraŭ ZŠA ŭ pieršym kvartale i 1 młrd. dołaraŭ ZŠA — u druhim. Skaračeńnie vałavych mižnarodnych reziervaŭ skłała bolš jak 0,4 młrd. dołaraŭ ZŠA, niahledziačy na pastupleńni ŭ pamiery prykładna 1,9 młrd. dołaraŭ ZŠA.
MVF zaznačaje, što ŭ červieni 2009 hoda biełaruskija ŭłady pastupova skarektavali kurs biełaruskaha rubla ŭ adnosinach da košyka i nablizili realny efiektyŭny valutny kurs da dakryzisnaha ŭzroŭniu. Byŭ taksama pašyrany kalidor valutnaha kursu i stali bolš žorstkimi rynačnyja pracentnyja staŭki.
Na dumku analitykaŭ fondu, adkaz na pytańnie ab tym, ci nieabchodnaja ŭ Biełarusi dalejšaja karekciroŭka valutnaha kursu, zaležyć ad unutranych mier, što pravodziacca biełaruskimi ŭładami.
Razychodžańnie pamiž unutranym popytam u Biełarusi i jaje handlovymi partniorami, jakoje nazirałasia ŭ 2008 hodzie, a taksama ŭ pieršaj pałovie 2009 hoda, rezka pavysiła popyt na impart i akazała mocny nacisk na valutny kurs.
U MVF taksama padkreślivajuć, što źniešniaje finansavańnie, atrymanaje ŭ 2009 hodzie, dazvoliła Biełarusi źmiakčyć najhoršyja nastupstvy hłabalnaha kryzisu, «ale ŭ siarednieterminovym płanie zaležnaść ad źniešniaha finansavańnia dla padtrymańnia ŭnutranaha popytu ekanamična nieprymalnaja».
Jak miarkujuć analityki fondu, dla ŭładaŭ isnuje značnaja ryzyka trapić u pastku scenaryja «pastajannaha deficytu pa rachunku najaŭnych apieracyj». Taki varyjant zapatrabavaŭ by abo admovy ad režymu kursavoj pryviazki, abo ŭviadzieńnia valutnych abmiežavańniaŭ pry padzieńni mižnarodnych reziervaŭ da niebiaśpiečna nizkaha ŭzroŭniu.
