U lutym 2023 hoda ŭ Minsku pačali budavać unikalny padziemny pierachod. U čym jaho ŭnikalnaść? Uzvodzili jaho pad praśpiektam Niezaležnaści bieź pierakryćcia ruchu. Heta značyć, kapali litaralna pad mašynami, kali jany jechali. Raboty vioŭ «Minskmietrabud».
Na pačatkovym etapie supracoŭniki «Minskmietrabud» stvaryli nadziejny P-padobny kupał nad tunelem. Jaho stvaryli z dapamohaj haryzantalna-šnekavaha bureńnia. Kanstrukcyja składajecca z 22-ch mietaličnych 40-mietrovych trub, jakija zapoŭnili bietonnym rastvoram. Dla jaje ŭzmacnieńnia śpiecyjalisty zmantavali 33 mietaličnyja ramy, pastavili armaturnyja karkasy, zabietanavali łatok ścienaŭ i zvodu tunelu, a finalnym akordam stała jaho mietałaizalacyja.
Asablivaść pierachodu jašče ŭ tym, što tut nie stali rabić lift, jak u inšych padziemnych pierachodach horada, a zbudavali nachilnyja pandusy — pa 5 pandusaŭ z kožnaha boku. Spusk vazka zajmaje značny čas.
Pierachod adkryŭsia ŭ kancy śniežnia 2023 hoda, prykładna tady ž, kali Alaksandr Łukašenka adkryvaŭ «Pieršy nacyjanalny handlovy dom».
I voś ciapier, praz usiaho čatyry miesiacy, pieradavy padziemny pierachod adpravili na ramont.
Pandusy dla vazkoŭ pierakryli stužkami i draŭlanymi paddonami: ciapier spuścicca pa leśvicy mohuć tolki zvyčajnyja piešachody abo, u krajnim vypadku, z rovarami.
Kala nižniaj kromki ścienaŭ ablezła farba.
Uzdoŭž usiaho pierachodu ŭźniali plitku na padłozie.
Na vuzkaj darožcy, pakinutaj dla piešachodaŭ, plitka prykmietna «hulaje» pad nahami.
Tut i tam lažać štabieli plitak i miaški z cemientam dy piaskom.
Rabočyja pracujuć užo niekalki dzion, paviedamili tyja, chto zvyčajna karystajecca pierachodam.
Miž inšym, padčas adkryćcia «Pieršaha nacyjanalnaha» Łukašenka rasparadziŭsia raspaŭsiudzić pieradavy vopyt budaŭnictva takich padziemnych pierachodaŭ na ŭsiu krainu.
Čytajcie taksama:
U tyktoku zachaplajucca minčukom, jaki jedzie ŭ mietro z trusikam. Ale nie ŭsio tak adnaznačna
