Čytačka padkazała vydańniu cikavy adras i navat padzialiłasia fatahrafijami, zroblenymi niekalki hadoŭ tamu.
Zvonku vokny kramy abklejenyja fatahrafijami interjeraŭ hetaj samaj kramy, pryčym fatahrafii nastolki detalovyja, što dobra bačnyja ceńniki na pradukty.
Na ceńnikach jašče tysiačy i dziasiatki tysiač rubloŭ! Heta značyć, što zdymka viałasia da denaminacyi, jakaja adbyłasia amal 7 hadoŭ tamu — u lipieni 2016-ha.
Pravierka Jandeks-panaram pakazała, što takimi samymi vitryny byli jašče ŭ 2014 hodzie. Atrymlivajecca, krama prosta ciapier raskazvaje nam, jakimi byli ceny tut minimum 10 hadoŭ tamu, kali nie raniej.
Heta krama pa Partyzanskim praśpiekcie, 120, mahazin Zavodskaha rajcharčhandlu — dziaržaŭnaj sietki ŭniviersamaŭ.
Sapraŭdy, usie vokny zaklejenyja fatahrafijami ščaślivych pakupnikoŭ na tle palic z praduktami.
Darečy, u ZRCHH jość jašče adna padobnaja krama — na Partyzanskim praśpiekcie, 67, — ale tam na fatahrafijach ceńniki zusim niečytelnyja.
Tut ža my možna ŭzhadać, pa kolki pradavalisia pradukty ź dziasiatak hadoŭ tamu. Kab pieravieści staryja ceny ŭ novyja, treba ich padzialić na 10 tysiač.
Praŭda, zusim paŭnavartasnaje paraŭnańnie pravieści nie atrymajecca, bo, pa-pieršaje, na vuličnych fota ceńniki bačnyja amal usiudy ŭ kandytarskich vyrabaŭ, a, pa-druhoje, redka jakija brendy i nazvy zachavalisia ŭ tym ža vyhladzie za 10 hadoŭ.
Fruktovy niektar, prydatny dla dziciačaha charčavańnia: 3.630 — 5.380 rubloŭ (heta značyć, na ciapierašnija hrošy 36-54 kapiejki. Dalej pieravodźcie sami). Ciapier piure ŭ hetaj samaj kramie kaštuje 1,13-1,56 rubla. Heta značyć, padaražeła ŭ 3 razy.
Kaša biezmałočnaja kukuruznaja i hreckaja dla dziciačaha charčavańnia — 7 940 — 8 180 rubloŭ. Ciapier padobnaja kaštuje 3,07 — 4,25 rubla. Tut padaražańnie prykładna ŭ 4-5 razoŭ.
Baton «Pramianisty» — adziny vid, ceńnik jakoha trapiŭsia na fota: 1 830 rubloŭ (heta 18 kapiejek ciapierašnimi!). Ciapier baton kaštuje 1,13-1,82 rubla. Padaražańnie ŭ 6-10 razoŭ!
Piečyva «Vasilkovy Słodyč» — redki vid, jaki syšoŭsia adzin u adzin. Kaštavaŭ 2 450 rubloŭ za pačak, ciapier — roŭna rubiel. Padaražańnie ŭ 4 razy.
Cukierki «Lubimaja Alenka», 300 hramaŭ: było 34 900 rubloŭ, stała 11,67 rubla. Padaražańnie ŭ 3,5 raza.
Małako kaštavała 4 580-7 070 rubloŭ, a ciapier kaštuje ŭ siarednim 2,25-3,5 rubla. Małočnyja pradukty taksama padaraželi prykładna ŭ 5 razoŭ.
Tvaražki i johurty: kaštavali 2 850-6 190 rubloŭ, a ciapier kaštujuć 0,69-2,64 rubla. Heta stała daražej u 3-4 razy.
Babrujski ziefir, 6 štuk va ŭpakoŭcy: kaštavaŭ taki 7 800 rubloŭ. Ciapier anałahičny kaštuje 2,59-3,71 rubla. Znoŭ padaražańnie ŭ 3-4 razy.
I jašče niekalki fatahrafij starych vitryn dla samastojnaha paraŭnańnia.
Čytajcie taksama:
U Minsku kala handlovaha centra pastavili «pieršaje nacyjanalnaje» vielikodnaje jajka FOTY
