U sudzie Partyzanskaha rajonu Minska pačalisia słuchańni kryminalnaj spravy advakata Kanstancina Białova, katory na praciahu mnohich hadoŭ absłuhoŭvaŭ VIP-pierson biełaruskaj stalicy.
Jak piša hazieta «Ježiednievnik», Kanstancin Białoŭ – adzin z samych viadomych advakataŭ Minska, pasłuhami jakoha karystalisia vielmi zamožnyja i ŭpłyvovyja ludzi. Mienavita jon u 2006 hodzie abaraniaŭ Aleha Badałava — dyrektara himnazii №16, dzie vučycca ŭnučka prezidenta i dzieci inšych upłyvovych pierson Biełarusi. Siarod klijentaŭ Kanstancina Białova byŭ u svoj čas i dyrektar tresta «Prambud» Uładzimir Mazaŭko, jaki budavaŭ Drazdy, a taksama elitny pasiołak kala Kurhana Słavy dla kiraŭnikoŭ krainy.
Historyja abarony jašče adnaho takoha VIP-klijenta i stała dla Kanstancina Białova fatalnaj. Havorka idzie pra haspadara i dyrektara TAA «Bielinterkuł».Starońniamu čałavieku nazva kampanii ni pra što nie skaža, ale ŭ peŭnym vuzkim kole jana davoli viadomaja. TAA «Bielinterkuł» było raniej najbujniejšym pastaŭščykom u Biełaruś sistem vientylacyi i kandycyjanavańnia.
«Bielintierkuł» ustaloŭvaŭ sistemy kandyjacyjavańnia dla rezidencyi Łukašenki, Nacyjanalnaha banka, MUS i inšych ministerstvaŭ i viedamstvaŭ. U 2007 hodzie dyrektara kampanii abvinavacili va ŭčynieńni dziaržaŭnym arhanizacyjam asabliva bujnoje škody. Byccam by jahonaja kampanija pastaŭlała sistemy vientylacyi i kandycyjanavańnia pa zavyšanych cenach, čym i była naniesienaja škoda na sumu kala miljona dołaraŭ.
Dyrektara aryštavali, a potym chutka vypuścili pad załoh, kab kampanija skončyła ŭstalavańnie sistem kandycyjavańnia ŭ rezidencyi prezidenta i pačała pahašać zrobleny ŭron.
Na praciahu dvuch hadoŭ rasśledavańnie spravy išło puści pavalusia. Na praciahu hetaha času dyrektar zdoleŭ amal całkam pahasić uron i pačaŭ z dapamohaj advakata Kanstancina Białova rychtavać prašeńnie na imia prezidenta ab pamiłavańni.
Adnak rasśledavańnie pieradali ŭ Hałoŭnaje śledčaje ŭpraŭleńnie papiaredniaha rasśledavańnia (HSU PR) MUS, katoraje ŭziałosia za spravu davoli hruntoŭna. Najpierš śledčyja pačali raźbiracca, na jakoj padstavie dyrektara vyzvalili ŭ 2007 hodzie, kali jon naahuł nijak nie supracoŭničaŭ ź śledstvam i nie davaŭ pryznalnych pakazańniaŭ z nahody taho, ź jakimi karupcyjanierami jon pracavaŭ pa dziaržzamovach.
Jak zajaviŭ u sudzie Kanstancin Białoŭ, jamu i jaho klijentu tak prosta i było skazana, što kali jany zaraz nie zdaduć usich karupcyjanieraŭ ź dziaržorhanaŭ, to miera strymańnia dyrektaru TAA «Bielinterkuł» budzie źmienienaja. Akramia taho, śledčyja paabiacali razabracca i ź dziejnaściu advakata.Pavodle Kanstancina Białova, mienavita jahonaja admova «stukać» na svaich klijentaŭ i stała pryčynaj jahonaha pieraśledu. Advakat zajaviŭ u sudzie, što ŭ jaho i jaho klijenta patrabavali źviestki pra karupcyjnuju dziejnaść namieśnika prakurora Minska Leanida Litviniuka, prakurora Minskaj vobłaści Michaiła Śniehira, načalnika Papiaredniaha rasśledavańnia HUUS Minharvykankamu Hienadzia Kazakieviča, a taksama inšych asobaŭ, u tym liku i tych, što zajmajuć vysokija pasady ŭ Hienieralnaj prakuratury.
«Ja nie čakaŭ, što ŭ lubimaj mnoj krainie mohuć adbyvacca takija rečy i słužbovyja asoby takoha ŭzroŭniu mohuć apuskacca da takich mietadaŭ raboty», — zajaviŭ u sudzie abvinavačvany advakatam.
Chacia apraŭdańni byłoha «załatoha» advakata Minska vyhladali ŭ sudzie vielmi niepierakanaŭča, niahledziačy na toje, što jon krasamoŭna razmalavaŭ maštabnuju zmovu suprać jaho i šerahu kiraŭnikoŭ pravaachoŭnych orhanaŭ, da jakich byccam by praź jaho sprabavali padabracca.
Advakat sapraŭdy mieŭ vielmi šyrokija suviazi ŭ pravaachoŭnych orhanach i, kali vieryć śledstvu, vielmi svojeasabliva vyrašaŭ prablemy svaich klijentaŭ.
Śledstvam pa spravie sabranyja dokazy taho, što Kanstancin Białoŭ nie tolki braŭ salidnyja hanarary ad klijentaŭ mima kasy, ale taksama padbivaŭ i atrymlivaŭ ad ich vialikija sumy dla pieradačy słužbovym asobam Hienieralnaj prakuratury, MUS, suda. Pryčym sumy, uličvajučy ŭzrovień klijentaŭ i suviaziaŭ advakata, uražvajuć.
Tak, pavodle źviestak śledstva, dyrektar TAA «Bieliterkuł» byŭ aryštavany zhodna z pastanovaj namieśnika prakurora Minska 22 žniŭnia 2007 hoda, a ŭžo 28 žniŭnia vypuščany pad załoh. Śledstva vałodaje źviestkami, što za svajo vyzvaleńnie dyrektar TAA «Bielinterkuł» pieradaŭ svajmu advakatu dla słužbovych asob Hienieralnaj prakuratury 50 tys. dołaraŭ.
U śledstva taksama jość źviestki, što ŭ inšych vypadkach advakat patrabavaŭ ad inšych svaich klijentaŭ i bolš vializnyja sumy. Naprykład, dla adnaho adnaho biźniesmiena cana svabody była vyznačana sumaj u 400 tys. jeŭra, katoryja pryznačalisia dla słužbovych asob Hienieralnaj prakuratury i suda.
Akramia taho, raspačynańniu kryminalnaj spravy ŭ adnosinach da advakata papiaredničała praviadzieńnie apieratyŭnaha ekśpierymientu, padčas jakoha była zafiksavana atrymańnie im chabaru dla słužbovych asob Hienieralnaj prakuratury ŭ pamiery 12 młn rubloŭ.
Nakolki abhruntavanaje vysunutaje suprać advakata abinavačvańnie, vyznačyć sud. Adnak kankretnych karupcyjanieraŭ, jakim abvinavačvany byccam by nasiŭ hrošy, pakul nie vyjaŭlena.Chacia, jak stała viadoma «Ježiednievniku», pravierka ŭ adnosinach da niekatorych słužbovych asob pravaachoŭnych orhanaŭ ciapier pravodzicca. Pakul ža advakatu ŭ sudzie pradjavili abvinavačvańnie ŭ ździajśnieńni machlarstva, padbivańnia da dačy chabaru i ŭčynieńni ŭronu biez prykmietaŭ kradziažu.
Sam abvinavačvany nie pryznaje siabie vinavatym ni pad adnym z pradjaŭlenych abvinavačvańniaŭ i nastojvaje na tym, što ŭsia sprava – sucelnaja pravakacyja HSU PR MUS, z katorym jon admoviŭsia supracoŭničać.
Asabliva ŭraziŭ apovied abvinavačvanaha pra toje, jak jaho zatrymlivali padčas apieratyŭnaha ekśpierymientu: na śpinu skočyli, naručniki mocna pieracisnuli, miašok na hałavu nadzieli, bili, pryhavorvajučy: «Havary, suka, jak prakurorskim hrošy nasiŭ!»
Chacia hety apovied śviedčyć tolki pra nieabhruntavanuju žorstkaść hrupy zatrymańnia, a zusim nie pra nievinavataść abvinavačvanaha. Z apošnim raźbiarecca ŭžo sud, katory, budziem spadziavacca, abjektyŭna daśleduje ŭsie dokazy i vyniesie spraviadlivy prysud. Pa spravie treba dapytać bolš za 50 śviedak, katoryja ŭ bolšaści svajoj źjaŭlajucca byłymi klijentami advakata. Uličvajučy ŭzrovień niekatorych ź ich, raspoviedy klijentaŭ abiacajuć być vielmi cikavymi.
