Bieskaryślivaść
Užo 19 hadoŭ. Tak, užo 19 hadoŭ jak ja paznajomiŭsia ź Leanidam Dziejkam, depuatam Viarchoŭnaha Savieta BSSR histaryčnaha CHII sklikańnia. I nieŭzabavie budzie 19 hadoŭ jak my ź Leanidam Ivanavičam zapisalisia ŭ siabry adnoŭlenaj sacyjał‑demakratyčnaj partyi.
Kolki ludziej pryjšło u partyju i syšło ź jaje, nie znajšoŭšy ŭ joj mahčymaści ździejśnić karjeru, palepšyć svoj materyjalny stan, kolki syšło dziela bojazi, strachu, — badaj, nie padličyć nichto. Kolki zastałosia nas, udzielnikaŭ Ustanoŭčaha źjezdu, u partyi? Heta skazać lohka.
Leanid Ivanavič byŭ udzielnikam histaryčnych padziej i sutvorcam histaryčnych aktaŭ.
Samyja značnyja, viekapomnyja ź ich — Dekłaracyja ab dziaržaŭnym suvierenitecie BSSR (27 lipienia 1990 h.), Zakon ab nadańni hetaj Dekłaracyi statusu kanstytucyjnaha aktu, Zakon ab zabieśpiačeńni ekanamičnaj i palityčnaj samastojnaści Biełaruskaj SSR (25 žniŭnia 1991 h.), pastanovy ab pieramienavańni Biełaruskaj SSR u Respubliku Biełaruś i ŭstanaŭleńni nacyjanalnaj simvoliki ŭ jakaści dziaržaŭnaj (19 vieraśnia 1991 h.).
Pra Lenida Ivanaviča ŭ jaho rodnym Klecku chodziać čutki. Ludzi kažuć, što deputat Dziejka vybiŭ sabie u premjera Kiebiča dźvie ci to try kvatery ŭ Miensku dy jašče adnu ŭ Niaśvižy.
Ja viedaŭ šmat deputataŭ Viarchoŭnaha Savieta CHII sklikańnia. Mnohija ź ich sapraŭdy niabłaha ŭładkavalisia. Ci to jany ŭ apazicyi, ci to pry ciapierašniaj uładzie. Leanid Ivanavič z tych, kaho nazyvajuć nieprabiŭnym.
Nie prabiŭ sabie ni kvatery ŭ Miensku, ni pasady ŭ jakoj‑niebudź pryŭładnaj kantory. I piensija budzie ŭ jaho, ja ŭpeŭnieny, niedeputackaja.
Takaja ŭ nas dziaržava. Takoje, na žal, niezaležnaje hramadstva, što čałaviek, jaki ani razu nie zdradziŭ demakratyčnym i nacyjanalnym kaštoŭnaściam, jaki aktyŭna supraćstajaŭ nastupu dyktatury i paciarpieŭ za heta, vymušany žyć bolš čym ścipła.
Z 1997 hoda Leanid Ivanavič vykonvaje abaviazki pres‑sakratara Biełaruskaj sacyjał‑demakratyčnaj partyi. Niadaŭna adzin naš małady tavaryš napisaŭ u svaim artykule, što adnoj z adznak žyćcia partyi źjaŭlajecca jaje sajt. Voś hety sajt i viadzie Leanid Dziejka ciaham apošnich ci nie dziesiaci hadoŭ. Možna skazać, viadzie za dziakuj.
Na svaich ziemlakoŭ z Kleckaha rajona Leanid Ivanavič nie kryŭduje. Navat radujecca za ich. Radujecca, što niezaležnaja dumka ŭ Klecku nie pamiraje. Radujecca, što, niahledziačy na šalonuju rusifikacyju, žyvie ŭ jahonych ziemlakoŭ tvorčy nacyjanalny duch. Radavaŭsia i radujecca kožnamu novamu vystupleńniu ŭ druku svajho ciozki Leanida Hałuboviča. Nie zabudu, jak adnaho razu Leanid Ivanavič, ničoha nie kažučy, pakłaŭ mnie na stoł ksierakopiju kleckaj rajonnaj haziety ź vieršam Ihara Kananoviča. I takim čynam adkryŭ mnie jašče adno cikavaje imia.
Jubilaraŭ pryniata nie tolki vinšavać, jubilaram pryniata vykazvać svaje zyčeńni. Žadajučy Leanidu Dziejku dobraha zdaroŭja, ja žadaju jamu, kab u žyćci jahonym było jak najmienš prykraściaŭ i bolš radaści. I jašče žadaju, kab moładź bačyła ŭ asobie Leanida Ivanaviča prykład bieskaryślivaha słužeńnia idei demakratyčnaj Biełarusi.
