Ministerstva kultury Biełarusi raspaŭsiudziła pres-reliz, u jakim pieraličvaje mierapryjemstvy, što rychtujucca da 80-hodździa Uładzimira Karatkieviča.
Abłvykankamy sumiesna ź Minskim i Aršanskim harvykankamami płanujuć miemaryjalizavać i dobraŭparadkavać miaściny, źviazanyja z žyćciom i dziejnaściu piśmieńnika. Pracy tut šmat. Bo tolki na adnoj Rahačoŭščynie, da prykładu, ich zachavałasia ź dziesiatak. Adny jon pieranios u svaje tvory, inšyja — paspryjali stvareńniu tych tvoraŭ. U Rahačovie zachavałasia chata dziadźki piśmieńnika, u jakoj byli napisanyja «Ładździa rospačy», «Sivaja lehienda». Ale na joj niama nijakaj šyldy, jakaja b raspaviadała pra Karatkieviča. U chacie možna było b stvaryć i asobny muziej. Bo ŭ pakojčyku ŭ miascovym krajaznaŭčym muziei, adviedzienym pad litaraturu kraju, piśmieńniku pryśviečana tolki para stendaŭ. Hetaha, zrazumieła, niedastatkova. Ale haspadar, stryječny brat Karatkieviča Siarhiej, admoviŭsia vyzvalić chatu i pierajechać u kvateru, jakuju jamu prapanoŭvała dziaržava. Pakul adzinaja pryjemnaja navina —
vulica Čkałava, na jakoj znachodzicca chata, budzie pierajmienavana ŭ honar Uładzimira Karatkieviča.
Sioleta ŭ Kijevie, dzie piśmieńnik vučyŭsia na fiłfaku univiersiteta imia Tarasa Šaŭčenki, paŭstanie jamu pomnik. Pa inicyjatyvie Ministerstva kultury i pry padtrymcy Ministerstva infarmacyi
praduhledžana vydańnie tvoraŭ Karatkieviča na zamiežnych movach. A taksama ich prezientacyja ŭ stalicach niekatorych krain.
Na kinastudyi «Biełaruśfilm» raspačali pracu nad stvareńniem 4-sieryjnaha televizijnaha mastackaha filma pa knizie «Kałasy pad siarpom tvaim». A letaś staršynia TRA sajuznaj dziaržavy Ihar Uholnik paviedamlaŭ, što budzie źniaty taksama film pa matyvach ramana «Čorny zamak Alšanski».
Akramia hetaha zapłanavana praviadzieńnie mastackich vystaŭ, kanfierencyj.
A na vulicach Minska źjaviacca biłbordy z partretam piśmieńnika.
Baćkoŭskaja chata Karatkieviča ŭ Oršy.
Na hetym paddašku ŭ Oršy Karatkievič napisaŭ pieršy varyjant «Dzikaha palavańnia karala Stacha».
Chata dziadźki piśmieńnika ŭ Rahačovie.
