Prakuratura Hrodzienskaj vobłaści zaviaršyła rasśledavańnie i pieradała dla razhladu ŭ abłasny sud kryminalnuju spravu pa abvinavačvańni dvuch žycharoŭ Hrodna ŭ trajnym zabojstvie i šerahu inšych złačynstvaŭ.
Nahadajem, złačynstva było ŭčynienaje nočču 14 kastryčnika 2009 hoda ŭ kvatery 2‑ha korpusa doma № 8 pa vulicy Kabiaka. Mienavita tam pažarnyja, jakija prybyli likvidavać uzharańnie, znajšli trupy 65‑hadovaha haspadara, jaho 34‑hadovaj niaviestki i jaje 52‑hadovaj znajomaj. Źnik syn maładoj žančyny — piacikłaśnik.
Śledstva ŭstanaviła, što 28‑hadovy i 29‑hadovy raniej sudzimyja hrodziency źjavilisia ŭ kvatery pozna ŭviečary 13 kastryčnika pad markaj sumiesnaha raśpivańnia śpirtnych napojaŭ i z metaj zavałodańnia majomaściu haspadaroŭ. Kala 2 hadzin 14 kastryčnika pa małaznačnaj pryčynie jany raspačali z haspadarami sprečku, padčas jakoj kuchonnym nažom byŭ zabity piensijanier. Zatym złačyncy zabili i žančyn, školniku pryhrazili zabojstvam, kali jon kamu‑niebudź raskaža pra ŭbačanaje. Paśla hetaha jany padpalili kvateru i syšli, prychapiŭšy z saboj kampjuter, inšyja rečy i dzicia.
Namahajučysia źjechać jak maha dalej ad Hrodna, złačyncy spynili taksi i prapanavali vadzicielu advieźci ich u Minsk ci Maskvu, majučy namier raźličycca ź im skradzienym kampjuteram. Atrymaŭšy admovu, pryhrazili zabić i navat pasprabavali zakranuć jaho nažom, adnak lohkaparanienamu taksistu ŭdałosia źbiehčy.
Zatym złačyncy pasprabavali skraści «Aŭdy‑80» na stajancy na vulicy Piestraka, jakaja nie achoŭvałasia, ale zrabić heta nie ŭdałosia. Z sałona jany skrali vadzicielskaje paśviedčańnie ŭłaśnika, techpašpart na aŭtamabil i inšyja dakumienty.
Paśla hetaha maładyja ludzi ź dziciem nakiravalisia ŭ kvateru adnaho ź ich, kab abmierkavać dalejšyja płany, dzie i byli zatrymanyja supracoŭnikami milicyi.
U ciapierašni čas hrodziency abvinavačvajucca pa pp.1, 6, 12, 15 č. 2 art. 139 (zabojstva dźviuch i bolš asob z asablivaj žorstkaściu, złučanaje z razbojnym napadam, učynienaje hrupaj asob), č. 3 art. 207 (razboj z pryčynieńniem ciažkich cialesnych paškodžańniaŭ), č. 2 art. 218 (naŭmysnaje paškodžańnie majomaści šlacham padpału), pp. 1, 6 č. 2 art. 182 (vykradańnie małaletniaha hrupaj asob), č. 2 art. 207 (razbojny napad), č. 1 art. 14 i č. 2 art. 205 (zamach na kradziež aŭtamašyny), art. 378 (kradziež dakumientaŭ) Kryminalnaha kodeksa.
