Źmiaščeńnie pad vartu staršaha śledčaha pa asabliva važnych spravach Hienieralnaj prakuratury Biełarusi Śviatłany Bajkovaj abskardžana hienieralnym prakuroram Ryhoram Vasilevičam u sudzie Centralnaha rajona stalicy.
Jak paviedamiŭ Vasilevič, pratest adchileny. Jaho padnačalenaja zastajecca pad vartaj.
Nahadajem, Śviatłana Bajkova, jakaja rasśledavała hučnyja karupcyjnyja spravy, u tym liku ŭ dačynieńni da byłoha dyrektara departamienta finansavych rasśledavańniaŭ KDK Anatola Hramoviča, była zatrymana supracoŭnikami KDB u kancy lutaha. Pra sutnaść vystaŭlenych joj abvinavačańniaŭ aficyjna nie paviedamlałasia.
3 sakavika hienprakuror zajaviŭ žurnalistam,
što ŭ jaho niama infarmacyi pra karyślivyja ci majomasnyja niezakonnyja dziejańni padnačalenaj.
Pry hetym jon dapuściŭ, što Bajkova mahła ŭčynić niejkija parušeńni pracesualnaha charaktaru. Adnak heta, pavodle słoŭ Vasileviča, budzie ŭstanoŭlena padčas śledstva.
15 sakavika na sajcie «Biełaruski partyzan» była apublikavana adozva da hienprakurora byłoha vykanaŭcy abaviazkaŭ načalnika adździeła pa baraćbie z karupcyjaj u orhanach dziaržaŭnaj ułady MUS Viačasłava Dudkina. Jon «pierakanany, što biesprecedentny pieraśled i aryšt viadučaha śledčaha Hienprakuratury pa karupcyjnych spravach Śviatłany Bajkovaj źjaŭlajecca čarhovym źvianom łancuha supraćpraŭnych dziejańniaŭ śpiecsłužbaŭ pad markaj «arhanizacyi nacyjanalnaj biaśpieki».
«Kryminalny pieraśled KDB śledčaj Bajkovaj maje vidavočna zamoŭleny charaktar z metaj paźbiahańnia pryciahnieńnia da adkaznaści vysokapastaŭlenych słužbovych asob pravaachoŭnych orhanaŭ
pa spravie, jakuju jana rasśleduje», — piša Dudkin. Jon ličyć, što, «uličvajučy abjom i značnaść infarmacyi, jakoj vałodaje Śviatłana Anatoljeŭna, u SIZA KDB jaje žyćcio znachodzicca ŭ niebiaśpiecy».
Viačasłaŭ Dudkin paprasiŭ Ryhora Vasileviča «admianić niezakonnyja pracesualnyja rašeńni KDB u dačynieńni da Śviatłany Bajkovaj i inšych supracoŭnikaŭ jaje hrupy, a taksama pieraškodzić dasiahnieńniu hałoŭnaj mety ich pieraśledu i zabiaśpiečyć poŭnaje, abjektyŭnaje i ŭsiebakovaje zaviaršeńnie rasśledavańnia kryminalnaj spravy ŭ dačynieńni da złačynnaj arhanizacyi kantrabandystaŭ i ich zastupnikaŭ, niahledziačy na čyny i zvańni».
