Spačatku Devid atrymaŭ nahoj pa tvary, a paśla parvaŭ achiłava suchažylle.
Devid Bekchem nie zmoža zhulać za zbornuju Anhlii na svaim čaćviortym suśvietnym pieršynstvie ŭ Paŭdniovaj Afrycy z pryčyny traŭmy achiłavaha suchažylla, jakuju jon atrymaŭ u matčy italjanskaha pieršynstva «Miłan»—«Kjeva».
Za paru chvilinaŭ da finalnaha śvistka paŭabaronca «Łos‑Andželes Hełaksi», jaki druhi hod zapar hulaje na pravach karotkaterminovaj arendy za «Miłan»,
biez usialakaha kantaktu z sapiernikam, jak kažuć, na roŭnym miescy pavaliŭsia i paprasiŭ zamienu.
Paśla akazańnia nieadkładnaj dapamohi Bekchem z dyjahnazam «razryŭ achiłava suchažylla» byŭ pierapraŭleny ŭ Finlandyju, dzie viadomy chirurh Sakary Orava pavinien zrabić jamu apieracyju. Paśla ahladu Bekchema doktar vyklučyŭ mahčymaść taho, što futbalist zmoža adnavicca da pačatku suśvietnaha pieršynstva.
Pry takich traŭmach termin paślaapieracyjnaj reabilitacyi zvyčajna składaje 3‑4 miesiacy, i tolki potym hulec moža prystupić da lohkich trenirovak, zaŭvažyŭ doktar.
U zajavie pradstaŭnikoŭ futbalista havorycca, što Devid Bekchem «zasmučany tym, što nie zmoža pryniać udzieł u čempijanacie śvietu». Pa ich słovach, hetaja traŭma ni ŭ jakim vypadku nie aznačaje kaniec jaho karjery.
Traŭma achiłava suchažylla supravadžajecca rezkim bolem i patrabuje nieadkładnaj aniestezii.
Pacyjent z razryvam achiła nie moža narmalna chadzić i padymacca na dybačkach.
Suchažylle zvyčajna zšyvajuć, apieracyja doŭžycca ŭ siarednim kala hadziny, zatym sustaŭ zamacoŭvajuć hipsam. Pavodle daktaroŭ, navat pry paśpiachovaj apieracyi nielha dać nijakaj harantyi poŭnaha adnaŭleńnia funkcyj achiła.
