Na viciebskim telekanale «Skif» pakazvajuć rolik, u jakim bard Siarhiej Bielazieka vykonvaje pieśniu ź bieł-čyrvona-biełym šalikam na šyi.
Bard udzielničaje ŭ tvorčym konkursie «Tvoj šaniec», jaki ładzić telekanał. Jaho biełaruskamoŭnuju pieśniu «Anioł» nie adrazu ŭklučyli ŭ prajekt.
«Mianie ŭstavili ŭ hetuju prahramu na paŭtara tydnia paźniej, čym astatnich. Za maju hramadzianskuju pazicyju mnie paŭtara tydnia pryjšłosia damahacca ŭklučeńnia ŭ prajekt», — adznačaje vykanaŭca.
Siarhiej Bielazieka vykonvaje ŭłasnuju pieśniu «Anioł». Admietna toje, što
jon vyjšaŭ na scenu pry zapisie rolika ź bieł-čyrvona-biełym šalikam na šyi.
Na videa jon zakryty hitaraj, ale ŭ siaredzinie pieśni, kali apieratar bujnym płanam pakazvaje barda, zaŭvažnyja nacyjanalnyja kolery šalika.
Tvorčy konkurs «Tvoj šaniec» — anałah rasijskaj prahramy «Chvilina słavy». Tolki ŭ viciebskim varyjancie prysutničaje sms-hałasavańnie, pa vynikach jakoha budzie vyznačany pieramožca. Heta mahčymaść tvorčamu čałavieku pakazać siabie. Pra kožnaha ŭdzielnika pa budniach na telekanale «Skif» pakazvajuć siužet i skaročany varyjant pieśni. A ŭ subotu i niadzielu vychodzić admysłovaja prahrama, u jakoj pieśni kankursantaŭ hučać całkam.
Režysior prajekta Dźmitryj Pietryša paviedamiŭ, što ŭžo 24 sakavika adbudziecca hała-kancert. Tady i budzie abvieščany pieramožca. A pakul sms-hałasavańnie praciahvajecca.
