Biełaruskaja partyja levych «Spraviadlivy śviet» praciahvaje brać udzieł u vybarach deputataŭ miascovych savietaŭ, paviedamiła namieśnik staršyni partyi Alena Skryhan.
Pavodle jaje słoŭ, na minułym tydni situacyja vakoł udziełu »Spraviadlivaha śvietu» ŭ vybarčaj kampanii abmiarkoŭvałasia na pasiadžeńni biuro centralnaha kamiteta partyi.
«My zasłuchali kiraŭnikoŭ abłasnych struktur. Jany adznačali nizkaje ŭklučeńnie pradstaŭnikoŭ partyi ŭ vybarčyja kamisii, kazali pra fakty nacisku na aktyvistaŭ partyi», — zaznačyła Skryhan.
Jana paviedamiła, što tolki 31 pradstaŭnik partyi sa 160 byŭ uklučany ŭ skład učastkovych kamisij.
«Usio heta stavić pad vialikaje sumnieńnie žadańnie ŭładaŭ pravieści svabodnyja demakratyčnyja vybary», — padkreśliła namieśnik staršyni partyi.
Skryhan taksama zaznačyła, što «Spraviadlivy śviet» budzie pravodzić kansultacyi ź inšymi apazicyjnymi partyjami dla vypracoŭki ahulnaj stratehii dziejańniaŭ na astatnich etapach vybarčaj kampanii.
Nahadajem, 21 sakavika źjezd Abjadnanaj hramadzianskaj partyi pryniaŭ rašeńnie admovicca ad udziełu ŭ vybarach u miascovyja saviety.
