«Mižnarodnaja amnistyja» źviarnułasia da Alaksandra Łukašenki z zaklikam uvieści maratoryj na śmiarotnaje pakarańnie paśla taho, jak u paniadziełak stała viadoma, što ŭ kancy minułaha tydnia jašče dva biełaruskija viaźni byli rasstralanyja.
Andrej Žuk i Vasil Juzepčuk byli asudžanyja da pakarańnia śmierciu ŭ 2009 hodzie za asobnyja złačynstvy. Ale ŭtrymlivalisia ŭ adnoj kamery śmiarotnikaŭ u Miensku.
U paniadziełak maci Andreja Žuka paviedamiła «Mižnarodnaj Amnistyi», što jana była painfarmavanaja turemnym načalstvam ab tym, što abodva viaźni byli rasstralanyja ŭ kancy minułaha tydnia.
«Śmiarotnaje pakarańnie samym žorstkim i biesčałaviečnym vidam pakarańnia. Jano parušaje prava na žyćcio i pavinna być admienienaje», — zajaviła dyrektarka prahramy «Mižnarodnaj Amnistyi» pa Eŭropie i Centralnaj Azii Hala Hovan.
Maci Andreja Žuka sprabavała pieradać charčovuju pasyłku ŭ piatnicu ranicaj, 19 sakavika, ale pasyłku joj viarnuli i paviedamili, što abodva viaźni «byli pieraviedzieny», i što jana bolš nie pavinna šukać syna, ale maje čakać paviedamleńnia z sudu. Baćka Andreja Žuka byŭ siońnia dastaŭleny ŭ špital z sardečnym prystupam paśla taho, jak pačuŭ viestku pra śmierć syna
Vasil Juzepčuk byŭ prysudžany da pakarańnia śmierciu 29 červienia 2009 hodu za zabojstva šaści pažyłych žančyn.
U časie praviadzieńnia raśśledavańnia i sudovaha razboru, jak śćviardžaje jaho advakat, byli istotnyja niedachopy. Advakat kaža, što Juzepčuka źbivali, kab prymusić jaho pryznacca.
Andrej Žuk byŭ prysudžany da pakarańnia śmierciu 22 lipienia 2009 hodu za ŭzbrojeny napad i zabojstva mužčyny i žančyny ŭ lutym 2009 hodu.
Jaho advakat vykazaŭ svaju zakłapočanaść z nahody pracedurnych parušeńniaŭ padčas pieršapačatkovaha dopytu Andreja.
Abodva viaźni abskardzili svaje prysudy, ale apelacyi byli adchilenyja. Abodva padali prašeńni ab pamiłavańni, adnak, pavodle infarmacyi, atrymanaj ad «Mižnarodnaj amnistyi», admoŭnaje rašeńnie prezydenta było paviedamlena źniavolenym za chvilinu da ich rasstrełu.
U kastryčniku 2009 hodu Kamitet pravoŭ čałavieka AAN zarehistravaŭ vypadki abodvuch viaźniaŭ i zaklikaŭ biełaruski ŭrad nie pryvodzić u vykanańnie śmiarotnyja prysudy da razhladu ŭ Kamitecie.
Śmiarotnyja prysudy Andreju Žuku i Vasilu Juzepčuku, — havorycca ŭ paviedamleńni «Mižnarodnaj Amnistyi», — byli pryviedzienyja ŭ vykanańnie nieŭzabavie paśla taho, jak Parlamenckaja asambleja Rady Eŭropy (PARE) prahałasavała za adnaŭleńnie statusu specyjalna zaprošanaha dla biełaruskaha parlamentu pry ŭmovie, što Respublika Biełaruś abjavić maratoryj na prymianieńnie śmiarotnaha pakarańnia.
