Skupščyna (parłamient Sierbii) pryniała rezalucyju, jakaja asudžaje zabojstva musulman baśnijskimi sierbami ŭ horadzie Srebranica ŭ lipieni 1995 hoda padčas baśnijskaj vajny.
Prajekt vyniesła na abmierkavańnie frakcyja «Za jeŭrapiejskuju Sierbiju». Dakumient źmiaščaje prabačeńni za toje, što Sierbija nie raspačała dziejańniaŭ, nieabchodnych dla praduchileńnia trahiedyi. U im žorstka asudžajecca złačynstva ŭ Srebranicy, vykazvajecca ščyraje spačuvańnie svajakam achviaraŭ i ŭtrymlivajecca abiacańnie znajści i pieradać sudu tych, chto niasie adkaznaść za zabojstvy.
Pa słovach lidera frakcyi Nadzi Kałundžy,
pryniaćcie rezalucyi «zdymie z budučych pakaleńniaŭ sierbaŭ ciažar, jaki ŭskłali na nas niekatoryja asoby, prademanstruje hatoŭnaść Sierbii da razryvu ź minułym i narmalizacyi stasunkaŭ z susiedziami, ablehčyć joj šlach u adzinuju Jeŭropu».
Paśla zachopu musulmanskaha ankłava na terytoryi samaabvieščanaj Respubliki Sierbskaj atradami Radavana Karadžyča i Ratki Mładziča, zvyš siami tysiač mužčyn, u tym liku padletkaŭ, što nie dasiahnuli 18 hadoŭ, byli vyviezieny na hruzavikach ŭ nieviadomym kirunku. Paśla vyśvietliłasia, što ich rasstralali, a cieły tajemna pachavali ŭ biezymiennych brackich mahiłach.
Raźnia ŭ Srebranicy, jakaja stała samym bujnym złačynstvam suprać čałaviečnaści ŭ Jeŭropie paśla Druhoj suśvietnaj vajny, vyklikała vialikaje abureńnie suśvietnaj supolnaści i pryviała da ŭmiašańnie NATA i padpisańnia Dejtanskich pahadnieńniaŭ.
Uzbrojenyja atrady baśnijskich sierbaŭ na čale z Radavanam Karadžyčam i Ratka Mładzičam, naŭprost nie padparadkoŭvalisia tahačasnym uładam Białhrada, ale karystalisia ich padtrymkaj. Karadžyč u ciapierašni čas znachodzicca pad śledstvam u Haazie, a miescaznachodžańnie Mładziča da hetaha času nieviadomaje.
Pryniaćciem rezalucyi zastałasia niezadavolenaja apazicyja, u pieršuju čarhu nacyjanalistyčnyja partyi. Na dumku lidera frakcyi «Demakratyčnaj partyi Sierbii» Miłaša Alihrudziča,
«pryniać hetuju dekłaracyju – značyć vymazać Sierbiju brudam». «My asudžajem złačynstva ŭ Srebranicy, ale złačynstvy ŭ inšych častkach byłoj Juhasłavii byli nia mienšymi» -- zajaviŭ kiraŭnik frakcyi partyi «Novaja Sierbija» Vielimir Ilič.
