Biełaruś vitaje padpisańnie Rasijaj i ZŠA Damovy ab mierach pa dalejšym skaračeńni i abmiežavańni stratehičnych nastupalnych uzbrajeńniaŭ (SNU). Z takoj zajavaj vystupiła Ministerstva zamiežnych spraŭ.
«Rasceńvajem heta jak surjozny ŭkład va ŭmacavańnie stratehičnaj biaśpieki i stabilnaści ŭ śviecie, — adznačajecca ŭ dakumiencie. — Raźličvajem, što rasijski i amierykanski baki raspačnuć zachady pa vypracoŭcy efiektyŭnych mier, skiravanych na dalejšaje skaračeńnie nastupalnych uzbrajeńniaŭ, jakija mahli b stvaryć umovy dla nadańnia pracesu jadziernaha razzbrajeńnia niezvarotnaha i šmatbakovaha charaktaru. Dalejšyja pośpiechi na razzbrajenčym «treku» šmat u čym buduć zaležać mienavita ad kalektyŭnych namahańniaŭ usich zacikaŭlenych členaŭ suśvietnaj supolnaści».
Biełaruski bok taksama «z zadavalnieńniem adznačaje pryznańnie ŭ preambule novaha dahavora ŭniosku Respubliki Biełaruś u praces jadziernaha razzbrajeńnia i nieraspaŭsiudžvańnia».
Biełaruś pieršaj ź dziaržaŭ dobraachvotna admoviłasia ad svajoj jadziernaj zbroi i na praciahu mnohich hadoŭ źjaŭlałasia adkaznym udzielnikam Dahavora ab abmiežavańni i skaračeńni stratehičnych nastupalnych uzbrajeńniaŭ 1991 hoda, padkreślivajecca ŭ zajavie.
«Zychodzim z taho, što Rasija i ZŠA buduć niaŭchilna vykonvać zafiksavanyja ŭ budapiešckich miemarandumach 1994 hoda harantyi biaśpieki, jakija byli paćvierdžany ŭ sumiesnaj rasijska‑amierykanskaj zajavie ad 4 śniežnia 2009 hoda. Uličvajučy unikalny vopyt, nazapašany biełaruskim bokam padčas vykanańnia jak dahavora ab SNU 1991 hoda, tak i inšych mižnarodnych pahadnieńniaŭ pa pytańniach jadziernaha razzbrajeńnia i nieraspaŭsiudžvańnia, raźličvajem na praciah palityčnaha dyjałohu i ekśpiertnaha ŭzajemadziejańnia pa hetaj prablematycy», — havorycca ŭ zajavie.
Treci pa liku rasijska‑amierykanski Dahavor SNU i pratakoł da jaho padpisany 8 krasavika ŭ Prazie prezidentami Dźmitryjem Miadźviedzievym i Barakam Abamam. Dziejańnie papiaredniaha Dahavora SNU — ad 1991 hoda — zaviaršyłasia 4 śniežnia 2009 hoda.
«Ja pierakanany, što ŭsio zroblenaje da hetaha času, — tolki pačatak vialikaha šlachu. Mnie b vielmi nie chaciełasia, kab adnosiny pamiž Rasijskaj Fiederacyjaj i Złučanymi Štatami Amieryki zvodzilisia tolki da pytańniaŭ abmiežavańnia stratehičnych nastupalnych uzbrajeńniaŭ», — zajaviŭ paśla padpisańnia dahavora Dźmitryj Miadźviedzieŭ.
Barak Abama adznačyŭ, što Rasii i ZŠA «ŭdałosia spynić drejf va ŭzajemaadnosinach i pakazać pieravahi supracoŭnictva». Amierykanski prezident nazvaŭ padpisańnie Dahavora SNU histaryčnaj padziejaj. Pavodle słoŭ Abamy, jon maje namier pravieści pracu ź sienatam, kab hety dahavor byŭ ratyfikavany sioleta.
