Alaksandr Łukašenka nahadvaje, što Rasija biaspłatna aranduje dźvie vajskovyja bazy na biełaruskaj terytoryi. Pra heta jon skazaŭ u niadzielu, adkazvajučy na pytańni žurnalistaŭ u Minsku.
«Hałoŭnakamandujučy Uzbrojenymi siłami Rasii, mabyć, zabyŭsia, što na terytoryi Biełarusi znachodziacca dźvie dziejučyja bazy: u rajonie Baranavičaŭ i rajonie Vilejki, -- padkreśliŭ jon. --
«I mahu nahadać, što ŭ adroźnieńnie ad Sievastopala Rasija płacić nam nul rubloŭ i nul kapiejek za arendu hetych bazaŭ».
Alaksandr Łukašenka prakamientavaŭ niadaŭniaje padpisańnie Rasijaj i Ukrainaj pahadnieńnia nakont padaŭžeńnia na 25 hadoŭ terminu arendy Rasijaj vajenna-marskoj bazy ŭ Sievastopali.
«Ja nie budu zajmacca padrabiaznaściami -- u Rasii heta ŭžo aktyŭna kamientujuć: navošta Rasii Čarnamorski fłot i h.d.
Heta ich sprava, z kim tam vajavać.
Heta sprava Rasii: ŭtrymlivać jaho ci nie ŭtrymlivać, jakaja cana hetaha fłotu.
Ale svaich kaleh va Ukrainie ja chaču pavinšavać z hetaj cudoŭnaj pieramohaj: jany atrymali niekalki miljardaŭ dalaraŭ za padpisańnie hetaj damovy.
Ale ja zaraz nie pra heta», -- skazaŭ kiraŭnik dziaržavy.
Prezident nahadaŭ, što ŭ rajonie Baranavičaŭ dziejničaje rasijskaja vajskovaja baza, funkcyjaj jakoj źjaŭlajecca rańniaje papiaredžańnie rakietnaha napadu. «Heta vielmi važnaja novaja baza, jakuju my ŭ svoj čas dabudoŭvali z Barysom Jelcynym», -- nahadaŭ biełaruski lider. «Druhaja baza zabiaśpiečvaje suviaź z padvodnym fłotam Rasijskaj Fiederacyi ŭ Atłantycy», -- dadaŭ jon.
«Kali prezident Rasiei pra heta zabyŭsia -- i pra Baranavičy i pra Vilejku -- čas nahadać», -- padkreśliŭ Alaksandr Łukašenka. «Voś vam spravy i namiery», -- dadaŭ jon.
Kiraŭnik dziaržavy taksama nahadaŭ, što biełaruskaja armija abaraniaje Rasiju na zachodnich rubiažach, składaje asnovu vajskovaj hrupoŭki sajuznaj dziaržavy. «Na Zachadzie ŭ Rasijskaj Fiederacyi, akramia biełaruskich Uzbrojenych siłaŭ, nikoha bolš niama», -- padkreśliŭ Alaksandr Łukašenka. Jon źviarnuŭ uvahu i na dziejsnuju damovu ab adzinaj sistemie SPA, na padpisańni jakoj tak nastojvała Maskva.
Taksama Łukašenka zajaviŭ, što pakul nie vyznačyŭsia, ci pajedzie na samit ADKB 8 maja.
Kiraŭnik dziaržavy adznačyŭ, što 27 krasavika źbiarecca hrupa vysokaha ŭzroŭniu, dzie budzie abmierkavany paradak dnia majučaha adbycca pasiadžeńnia ADKB. Tut ža płanujecca razhledzieć pytańnie pa Kyrhyzstanie. Prezident padkreśliŭ, što kali sprava hetym abmiažujecca, «toje, kaniečnie, mnie tam rabić».
Jon taksama dadaŭ, što ŭ červieni zapłanavana praviadzieńnie poŭnafarmatnaha pasiadžeńnia ADKB, dzie budzie razhledžana kala 15 pytańniaŭ.
Na pytańnie adnaho z žurnalistaŭ, ci moža ADKB u jaje ciapierašnim farmacie ŭpłyvać na situacyi, padobnyja da Kyrhyzstana, a jašče raniej Abchazii i Paŭdniovaj Asiecii,
Alaksandr Łukašenka skazaŭ: «Ciapierašnija padziei adkazvajuć na hetaje pytańnie.
Kali ADKB nie moža svoječasova paŭpłyvać -- značyć, takaja arhanizacyja». «Pierśpiektyŭ hetaja arhanizacyja nie maje, kali i dalej tak budzie raźvivacca situacyja», -- dadaŭ jon.
Łukašenka taksama zajaviŭ, što rasijskaje kiraŭnictva niepaśladoŭnaje ŭ vykazvańniach pra «pracaŭładkavańnie» vysokapastaŭlenych asob, jakija pakinuli svaju krainu.
Vykazvańni rasijskaha kiraŭnictva demanstrujuć padvojnyja standarty.
«Što tyčycca dekłaravańnia taho, što treba iści nasustrač adzin adnamu, to Dźmitryj Miadźviedzieŭ napeŭna mieŭ na ŭvazie Biełaruś. Bo tolki Biełaruś zaŭsiody išła nasustrač rasijskim čakańniam», -- ličyć Alaksandr Łukašenka.
«Što tyčycca pracaŭładkavańnia, to, mnie zdajecca, jon mieŭ na ŭvazie svajho papiarednika na pasadzie prezidenta RF -- Uładzimira Pucina, jaki ŭ svoj čas uładkavaŭ u siabie Akajeva i mnohich inšych», -- dadaŭ jon.
Kiraŭnik dziaržavy adznačyŭ, što paprasiŭ svaich pamočnikaŭ padrychtavać jamu adpaviednuju infarmacyju ab padziejach padčas «ciulpanavaj revalucyi». Alaksandr Łukašenka začytaŭ cytatu Uładzimira Pucina padčas tych padziejaŭ. 25 sakavika 2005 h. prezident Pucin, kamientujučy situacyju ŭ Kyrhyzstanie, skazaŭ: «Što tyčycca mahčymaści pryjezdu ŭ Rasiju Askara Akajeva, to my nie budziem piarečyć».
«Čamu tady heta ličyłasia mahčymym, a pryjechać ciapierašniamu prezidentu ŭ Biełaruś – niemahčyma? – aburyŭsia biełaruski lider. –
Miadźviedzieŭ, mabyć, pakryŭdziŭsia na toje, što Bakijeŭ pryjechaŭ u Biełaruś, a nie ŭ Rasiju. Ale, mabyć, u Kurmanbieka Salijeviča byli na toje svaje važkija padstavy».
Alaksandr Łukašenka nahadaŭ, što tady ž, u 2005 hodzie, Uładzimir Pucin skazaŭ, što padziei ŭ Kyrhyzstanie -- vynik słabaści ŭłady i nazapašanych sacyjalna-ekanamičnych prablem:
«Heta nie stała dla nas niečym nie čakanym. Razam z tym vartaja škadavańnia taja akaličnaść, što čarhovy raz u adnoj z krain na postsavieckaj prastory palityčnyja pytańni vyrašajucca nie pravavym sposabam, a supravadžajucca pahromami i čałaviečymi achviarami».
I jašče, kažučy pra tuju apazicyju, jakaja pryjšła da ŭłady ŭ 2005 hodzie, prezident Rasiei tady vykazaŭ nadzieju, što jana zmoža ŭziać situacyju pad kantrol, skazaŭ: «Hetyja ludzi nam dobra viadomyja. Jany ŭsialak spryjali raźvićciu adnosin pamiž Rasijaj i Kyrhyzstanam». To bok užo na toj momant Kurmanbiek Bakijeŭ sa svaimi kalehami šmat zrabiŭ dla Rasii i narmalnych adnosinaŭ ź joj».
Voś paraŭnajcie vykazvańnie hetaha čałavieka tady i vykazvańni Dźmitryja Miadźviedzieva ciapier. Chiba heta nie padvojnyja standarty?
Chiba heta nie supiarečnaść? Heta, pa-pieršaje. Pa-druhoje, ja paprasiŭ u svaich pamočnikaŭ daviedku ab pracaŭładkavańni vysokapastaŭlenych biežancaŭ», jakija asieli ŭ Rasii.
Askar Akajeŭ – były prezident Kyrhyzstana, Asłan Abašydzie – były lider Adžaryi, a taksama były kiraŭnik «Naftahaza» Ukrainy, były ministr unutranych spraŭ Ukrainy, były mer Adesy i mnohija inšyja», - adznačyŭ Łukašenka.
