1 maja ŭstanoŭleny novy pamier biudžetu pražytačnaha minimumu (BPM). Jak paviedamlaje aficyjny sajt Ministerstva pracy i sacyjalnaj abarony, BPM składaje 266 tys. 230 rubloŭ u siarednim na dušu nasielnictva i vyras na 4,3% u paraŭnańni ź dziejnym z 1 lutaha pa 30 krasavika (255 tys. 220 rubloŭ).
Pamiery BPM z 1 maja pa 31 lipienia ŭ siarednim na dušu nasielnictva i pa asnoŭnych sacyjalna‑demahrafičnych hrupach zaćvierdžany pastanovaj Savieta ministraŭ № 651 ad 29 krasavika. BPM dla pracazdolnaha nasielnictva składaje 284 tys. 860 rubloŭ, dla piensijanieraŭ — 238 tys. 380 rubloŭ, dla dziaciej‑studentaŭ — 285 tys. 500 rubloŭ, dla dziaciej ad 3 da 16 hadoŭ — 325 tys. 980 rubloŭ, dla dziaciej da 3 hadoŭ — 237 tys. 410 rubloŭ.
U struktury biudžetu pražytačnaha minimumu ŭ siarednim na dušu nasielnictva ŭ cenach sakavika pradukty charčavańnia składajuć 53,6%, płata za karystańnie žyłym pamiaškańniem i kamunalnyja pasłuhi — 16,4%, pradmiety harderoba — 17,2%, bytavyja i transpartnyja pasłuhi — 6,9%, tavary bytavoha i haspadarčaha pryznačeńnia — 3,3%, pradmiety pieršaj nieabchodnaści, sanitaryi i leki — 2,2%.
Biudžet pražytačnaha minimumu ŭjaŭlaje saboj vartasnuju vieličyniu minimalnaha naboru materyjalnych dabrot i pasłuh, nieabchodnych dla zabieśpiačeńnia žyćciadziejnaści čałavieka i zachavańnia jaho zdaroŭja, a taksama abaviazkovyja płaciažy i ŭznosy.
Biudžet pražytačnaha minimumu jak sacyjalny narmatyŭ vykarystoŭvajecca dla analizu i prahnazavańnia ŭzroŭniu žyćcia nasielnictva; akazańnia dziaržaŭnaj sacyjalnaj dapamohi małazabiaśpiečanym hramadzianam (siemjam); abhruntavańnia minimalnych dziaržaŭnych sacyjalna‑pracoŭnych harantyj.
