15 maja ŭ muziejnym kompleksie «Dudutki» raspačaŭsia Ch «Dudarski fest», jaki sabraŭ razam lepšych muzykaŭ z usioj krainy.
U sioletniaj prahramie byli navinki. Akramia tradycyjnych vystupaŭ hurtoŭ, prajšli kamierny kancert dudaroŭ i konkurs impravizacyi z dy-džejam.
Aleś Žura.
Todar Kaškurevič rekłamuje almanach «Druvis».
Samaja maleńkaja amatarka pasłuchać dudu.
Kampanija «Biełpi» naładziła dehustacyju «Krambambuli».
Hurt «Rasalija».
Hurt «Stary Olsa».
Siaredniaviečny bal.
Raspačaŭsia fest kamiernym kancertam «Adradžeńnie aŭtentyčnaj tradycyi» ŭ zale vystaŭ. Naŭmysna nie stali hrać na adkrytym pavietry. Svajo majsterstva demantsravali Todar Kaškurevič, Juraś Pankievič, Aleś Čumakoŭ, Aleś Žura, Jaŭhien Baryšnikaŭ. Aleś Žura tolki niadaŭna viarnuŭsia ŭ Biełaruś. I heta byŭ ci nie pieršy jaho vystup tut za apošnija šeść hadoŭ. Hety čas jon pravioŭ u Sankt-Pieciarburhu, dzie hraŭ u roznych andehraŭndnych hurtach.
Vystupy na adkrytym pavietry pačalisia ŭviečary. Kali ŭ Minsku išoŭ doždž, u «Dudutkach» było soniečna. Ale heta nie paspryjała tamu, kab na fest pryjechała bolš ludziej. Navat pad siaredniaviečnyja miełodyi «Staroha Olsy» achvotnych patančyć było niašmat. Vidavočna, što mnohija pabajalisia pryjechać z-za mahčymaha daždžu.
Na scenu vychodzili hurty «Kielich koła», «Rasalija», «Kašłaty voch», Testamentum terrae i inšyja. Sončyŭsia pieršy dzień festu konkursam impravizacyi z dy-džejam. Ci pryžyviecca taki ekśpierymient siarod dudaroŭ, pakaža čas. Ale siońnia niekatoryja muzyki staviacca admoŭna da takich navinak.
Praciahniecca «Dudarski fest» da 19 maja. U hety dzień u Minsku ŭ Parku Čaluskincaŭ adbudziecca kancert z udziełam hurtoŭ «Stary Olsa», «Rasalija», Testamentum terrae, «LitvinTrol», Znich, «Unija», «Javaryna». A siońnia, 16 maja, na chutary Alesia Łasia dudary pravodziać kanfierencyju, na jakoj abmiarkujuć dasiahnieńni ŭ śviecie dudarskaha ruchu.
