Kolkaść prapanovy žylla na druhasnym rynku dasiahnuła maksimumu za apošnija 5 hadoŭ.
Zhodna z padlikami ekśpiertaŭ rynku nieruchomaści, za čatyry z pałovaj miesiacy sioleta ceny na minskija kvatery źnizilisia prykładna na 3%. I heta pry tym, što ŭ studzieni i lutym u stalicy nazirałasia nievialikaje časovaje padaražańnie žylla. Śpiecyjalisty adznačajuć, što hetaj viasnoj kvatery na druhasnym rynku hałoŭnaha miehapolisa krainy ŭvohule amal nie kuplalisia. Aktyŭnaść rynka pa hetym siehmiencie siońnia nabližajecca da nula. Pra jakuju situacyju na druhasnym rynku staličnaha žylla siońnia idzie havorka? Čakaje nas dalejšaje patańnieńnie kvater abo vosieńniu budzie naziracca čarhovaja chvala padaražańnia žyllovaj nieruchomaści? Svaimi mierkavańniami na hety kont padzialiŭsia staršynia Savieta Biełaruskaj asacyjacyi «Nieruchomaść» Mikałaj Prastałupaŭ.
Na rynku znoŭ źjavilisia tannyja adnapakajoŭki
Adrazu nahadaju, što ŭ pieršym paŭhodździ 2009 hoda staličnyja kvatery tańnieli davoli chutkimi tempami. Potym pačaŭsia etap stabilizacyi cenaŭ, a ŭ lipieni‑žniŭni z rynka pakupnikami byli «pavymyvanyja» ŭsie tannyja adnapakajoŭki. Ekśpierty rynku tady kateharyčna zajaŭlali, što adnapakajovak pa košcie nižej 40—42 tysiač dalaraŭ užo nikoli nie budzie, adnak…
Mikałaj Prastałupaŭ adznačaje, što ciapier bieź vialikich prablem možna adšukać nievialikija pa płoščy adnapakajovyja «chruščoŭki» za 37—38 tysiač dalaraŭ. Pa takim košcie prapanujucca kvatery na krajnich pavierchach piacipaviarchovych starych damoŭ pa vulicach Čyhładzie, Paŭłoŭskaha, Kašavoha, Sadovaj i Krasina. Pa košcie da 40 tysiač dalaraŭ jość navat standartnyja adnapakajoŭki ŭ panielnych damach, adnak tolki na pieršych pavierchach. U dyjapazonie cenaŭ da 45 tysiač dalaraŭ infarmacyjnyja katałohi siońnia prapanujuć mnostva adnapakajovych kvater badaj va ŭsich mikrarajonach stalicy.
Samaja vialikaja kolkaść prapanoŭ datyčycca adnapakajovak pa košcie ad 45 da 55 tysiač dalaraŭ.
Uvohule, siońnia siaredni košt prapanovy kvadratnaha mietra adnapakajovych kvater na druhasnym rynku Minska składaje 1475 dalaraŭ. Tolki za apošni tydzień ceńnik žyllovaha «kvadrata» maleńkich kvater źniziŭsia adrazu na 12 dalaraŭ.
Źjavilisia dvuchpakajoŭki da 50 tys USD
Samaja vialikaja kolkaść prapanoŭ na druhasnym rynku stalicy prypadaje na dvuchpakajovyja kvatery. U hetym siehmiencie taksama źjavilisia tannyja žyllovyja abjekty.
Nievialikija «dvuchpakajoŭki» ahulnaj płoščaj da 43 kvadratnych mietraŭ na krajnich pavierchach u starych damach kaštujuć ciapier ad 43 da 47 tysiač dalaraŭ. Takoje žyllo isnuje ŭ damach pa vulicach Karvata, Haja, Piermskaj, Rotmistrava, Ščarbakova, Palihrafičnaj i inš. Amal usie dvuchpakajovyja «chruščoŭki» vystaŭleny ciapier na rynku pa košcie da 55 tysiač dalaraŭ. Standartnyja dvuchpakajovyja kvatery ahulnaj płoščaj da 53 kvadratnych mietraŭ prapanujucca pa ceńniku ad 55 da 70 tysiač dalaraŭ. Isnujuć na rynku i daražejšyja «dvuški», ale takim žyllom ciapier nie cikaviacca navat bahatyja patencyjalnyja pakupniki.
Siaredni košt prapanovy kvadratnaha mietra dvuchpakajovych kvater składaje 1449 dalaraŭ. Za apošni tydzień siaredni košt mietra takich kvater pamienšyŭsia na 7 dalaraŭ.
Samyja tannyja trochpakajovyja kvatery siońnia prapanujucca za 55—65 tysiač dalaraŭ.
Siaredni ceńnik na hetym siehmiencie kvater ciapier vahajecca ad 70 da 80 tysiač dalaraŭ. Siaredni košt prapanovy kvadratnaha mietra trochpakajovych kvater na druhasnym rynku stalicy składaje 1400 dalaraŭ.
Kolkaść ździełak pamienšyłasia ŭ razy
Na druhasnym rynku staličnaha žylla hetaj viasnoj nazirajecca vielmi składanaja situacyja, bo kolkaść ździełak rezka skaraciłasia. Pakazalnym pa hetym paramietry byŭ 1998 hod, kali ŭ stalicy było zafiksavana kala 34 tysiač ździełak kupli‑prodažu. U 1999 hodzie aktyŭnaść pakupnikoŭ źniziłasia da 32120 ździełak. u 2000 hodzie — 24 tysiačy, u 2001 — 19200. Samym drennym dla ahienctvaŭ nieruchomaści staŭ 2006 hod, kali było aformlena ŭsiaho 6780 ździełak. U apošnija dva hady ŭ Minsku rehistravałasia štohod prykładna 9—10 tysiač ździełak kupli‑prodažu žyllovaj nieruchomaści.
Pavodle prahnozaŭ Mikałaja Prastałupava sioleta kolkaść zarehistravanych ździełak moža być navat mienš za 6 tysiač. Jašče hod tamu ŭ stalicy pracavała 125 ahienctvaŭ nieruchomaści, ciapier ich zastałosia 108. Staršynia asacyjacyi nie vyklučaje vierahodnaść taho, što jašče da novaha hoda ahienctvaŭ nieruchomaści ŭ stalicy stanie jašče mienš na 20—30 struktur.
Patańnieńnie praciahniecca i ŭ nastupnym hodzie?
«Zamarožvańnie» druhasnaha rynku žyllovaj nieruchomaści adbyvajecca na fonie pavialičeńnia kolkaści prapanoŭ kvater na prodaž. Siońnia na ahulnym minskim kvaternym rynku na prodaž prapanujecca adrazu kala 10 tysiač kvater. Heta samaja vialikaja prapanova za apošnija 5—7 hadoŭ. Atrymlivajecca, što ŭ ludziej jość žadańnie pradać svaju kvateru, dakłaści hrošaj i palepšyć svaje žyllovyja ŭmovy, adnak… Kab realna pradać žyllo, treba abaviazkova zhadžacca na 10—15‑pracentnyja źnižki. A kab adbyłasia łancuhovaja ździełka ź vialikaj kolkaściu kvater, treba damovicca pra takija źnižki z usimi ŭdzielnikami «žyllovaj rakiroŭki». Realna zrabić heta amal niemahčyma, bo nichto nie choča «prahareć».
Ciapier na rynku skłałasia takaja situacyja, kali na fonie minimalnaj kolkaści ździełak nazirajecca vielmi marudnaje patańnieńnie žyllovaj nieruchomaści. Mikałaj Prastałupaŭ ličyć, što ŭ žniŭni—kastryčniku druhasny rynak žylla moža krychu «razvarušycca», kali znoŭ buduć «vymyvacca» tannyja kvatery. Adnak i heta amal nijak nie paŭpłyvaje na ahulny cenavy fon minskich kvater. Kvatery buduć pacichu tańnieć sioleta i navat u pieršyja try miesiacy nastupnaha hoda. Kardynalnyja źmieny na rynku mohuć uźniknuć tolki ŭ tym vypadku, kali pavialičacca dachody siaredniaha kłasa rabotnikaŭ stalicy, ci kali stanuć dastupnymi kamiercyjnyja kredyty.
Dolevaje budaŭnictva i pryvatnyja damy
Pavodle infarmacyi Mikałaja Prastałupava, za apošnija 7—8 miesiacaŭ abjom budaŭnictva kamiercyjnaha žylla ŭ stalicy pamienšyŭsia prykładna na 30 pracentaŭ. Nie lepšyja svaje časy pieražyvaje i śpiektr dolevaha budaŭnictva.
Usio čaściej zabudoŭščyki prapanujuć klijentam kvatery ŭ panielnych damach pa nievialikim košcie. Takim čynam arhanizatary pryciahvajuć u sistemu dolevaha budaŭnictva «čarhavikoŭ» stalicy, jakija majuć mahčymaść karystacca lhotnymi kredytami pad 5 pracentaŭ hadavych. Sapraŭdy, tannaj prapanovy pa dolevym budaŭnictvie siońnia amal nie zastałosia.
Košt kvadratnaha mietra dolevaha budaŭnictva damoŭ na stadyi hatoŭnaści pieršych troch pavierchaŭ składaje 1200—1300 dalaraŭ. U całkam pabudavanych damach žyllovy kvadrat kamiercyjnaha novaha žylla kaštuje 1400—1500 dalaraŭ.
U samym pačatku arhanizacyi dolevaha budaŭnictva kvadratny mietr žylla prapanujecca klijentam siońnia za 1050—1150 dalaraŭ. Nahadaju, što takoje žyllo prapanujecca zabudoŭščykami biez azdableńnia. Šmatpakajovyja kvatery vialikich płoščaŭ u takich damach pradajucca słaba. Mikałaj Prastałupaŭ adznačyŭ, što ciapier u Malinaŭcy na druhasnym rynku mahčyma adšukać trochpakajovyja kvatery, dzie košt kvadratnaha mietra składaje 1150 dalaraŭ ci krychu bolš.
Istotniej usiaho patańnieli sioleta nie kvatery ŭ bujnych haradach, a jakasnyja pryvatnyja damy ŭ vioskach i rajonnych centrach, ličyć M. Prastałupaŭ.
Siońnia ŭsio aktyŭniej pačali cikavicca takoj žyllovaj nieruchomaściu hramadzianie Rasii, jakija majuć svajakoŭ u Biełarusi. Ciapier dobryja pryvatnyja damy ŭ nasielenych punktach adlehłaściu da 50 km ad stalicy mahčyma adšukać pa košcie kala 10—20 tysiač dalaraŭ.
