Nahodaj stała admoŭnaje zaklučeńnie z Hienieralnaj prakuratury i Ministerstva justycyi pa pytańni, što vynosicca na refierendum.
Jak paviedamiła na pasiadžeńni 20 maja člen CVK Nadzieja Kisialova, schod inicyjatyŭnaj hrupy prajšoŭ u adpaviednaści z zakanadaŭstvam, adnak Centrvybarkam atrymaŭ admoŭnaje zaklučeńnie z Hienieralnaj prakuratury i Ministerstva justycyi pa pytańni, što vynosicca na refierendum.
Na dumku hetych dziaržorhanaŭ, prapanavanaje dla vyniasieńnia na refierendum pytańnie «nie nosić vyraznaha i jasnaha charaktaru, a adkazy na jaho mohuć być vytłumačany pa-roznamu».
Kisialova taksama vykazała ŭłasnaje mierkavańnie pa hetaj inicyjatyvie. Jana, u pryvatnaści, ličyć, što prapanavanaje dla vyniasieńnia na refierendum pytańnie «nie maje zrazumiełaj pravavoj pierśpiektyvy». «Staŭki pošlin zamacavanyja ŭ adzinym mytnym taryfie Biełarusi, Kazachstana i Rasii. Biełaruś pryznaje pryjarytet mižnarodnaha prava pierad nacyjanalnym. Havorka idzie nie tolki pra pytańni dziaržaŭnaha žyćcia, ale i miždziaržaŭnych adnosinaŭ», — skazała jana.
U vyniku rašeńnie ab admovie ŭ rehistracyi inicyjatyŭnaj hrupy było pryniataje Centrvybarkamam 20 maja adnahałosna
Inicyjataram respublikanskaha refierendumu vystupiła ŭ śniežni 2009 hoda Partyja BNF. Jaje pradstaŭniki prapanavali vynieści na ŭsienarodnaje hałasavańnie pytańnie: «Ci padtrymlivajecie vy zachavańnie pamieru mytnych pošlin na ŭvoz u Respubliku Biełaruś lehkavych aŭtamabilaŭ zamiežnaj vytvorčaści na ŭzroŭni 26 listapada 2009 h.?».
U kiraŭnictvie partyi miarkujuć, što pahadnieńnie ab stvareńni Mytnaha sajuza, padpisanaje 27 listapadzie 2009 hoda ŭ Minsku kiraŭnikami Biełarusi, Kazachstana i Rasiei, «ihnaruje intaresy značnaj častki hramadzian Biełarusi, dla jakich ustupleńnie ŭ siłu padpisanych dakumientaŭ paciahnie paharšeńnie asabistaha materyjalnaha dabrabytu ŭ suviazi sa značnym padvyšeńniem mytnych taryfaŭ i, adpaviedna, koštaŭ na važnyja katehoryi tavaraŭ, u pryvatnaści na lehkavyja aŭtamabili».
Pakul padvyšeńnie pošlin zakranuła jurydyčnych asob i indyvidualnych pradprymalnikaŭ. Z 2010 h. pošliny daviedzienyja da ŭzroŭniu rasijskich, pryčym na niekatoryja impartnyja aŭtamabili jany pavialičylisia ŭ 10 razoŭ.
Dla fizičnych asob u ramkach Mytnaha sajuza novyja praviły ŭvozu aŭtamabilaŭ pakul nie vyznačany. Čakajecca, što pošliny na ŭvoz transpartnych srodkaŭ fizičnymi asobami pavysiacca 1 lipienia 2010 hoda, kali pavinien ustupić u siłu Mytny kodeks i zarabić u poŭnym abjomie Mytny sajuz Biełarusi, Kazachstana i Rasii.