Barysaŭski BATE staŭ dvuchrazovym uładalnikam Kubka Biełarusi pa futbole dy zavajavaŭ druhi trafiej u siezonie (paśla pieramohi ŭ Supierkubku). 23 maja na minskim stadyjonie «Dynama» jon razhramiŭ žodzinskaje «Tarpieda» – 5:0.
BATE pa vynikach pieršaha kruha nacyjanalnaha čempijanata – biassprečny lider (25 bałaŭ), «Tarpieda» zajmaje pieradapošni radok (9 bałaŭ). Zusim spravy švach u minskaha «Partyzana» – 1 bał.
Voś i siońnia «Tarpieda» supraciŭlaŭsia pieršyja čatyry chviliny i navat nanios pieršy ŭdar pa varotach. A praz chvilinu BATE adkryŭ lik. Sa štrafnoha zabiŭ brazilski lehijanier Renan Bresan. Hulcy «Tarpieda» tolki biezdapamožna pravodzili miač vačyma.
Na 22-j chvilinie ŭ hulni intryha była źviedziena na nul.
Vital Radzivonaŭ, atrymaŭšy pas ad Lichtarovič, prosta zakinuŭ miač hałkipieru za škirku. Hałoŭnaja intryha ciapier była ŭ tym, pojdzie doždž ci nie, i kali. Pajšoŭ, pamiž 4-m i 5-m hałami BATE u 2-m tajmie.
Za dziesiać chvilin da kanca pieršaha tajma padałosia, što finalny matč hetym i abmiažujecca, nastolki ŭsio było jasna ŭ hulni. Aproč taho na biehavoj darožcy źjavilisia dziaŭčaty ŭ nacyjanalnych strojach, vynieśli padnos ź miedalami. Jak potym vyśvietliłasia, u pierapynku hanaravali ŭdzielnikaŭ turniru pa plažnym futbole.
U druhim tajmie «Tarpieda» amal stała. Kamanda nie toje, što nie dachodziła da čužoj štrafnoj, navat ź ciažkaściami pierasiakała centralnuju liniju – BATE spyniała ich ataki ŭ zarodku.
A potym žodzincy atrymali jašče try praboiny.
Na 57-j ź pienalci vyznačyŭsia Arciom Kancavy, na 64-j Renan Bresan, a finalnuju kropku na 69-j pastaviŭ Vital Radzivonaŭ – 5:0. Choć tady padałosia, što heta daloka nie apošni miač u hulni.
Čym jašče zapomniłasia hulnia? Było šmat hrubaści, udaraŭ pa nahach. Tak, pry kancy pieršaha tajma za hrubuju hulniu byŭ vydaleny najlepšy bambardzir «Tarpieda» Biahanski. A taksama bolš za dziasiatak afsajdaŭ futbalistaŭ BATE.
A potym było śviatkavańnie pieramohi ŭładalnikami trafieju, avacyja, zładžanaja zaŭziatarami, pryznańnie najlepšym futbalistam hulni Alaksandra Jureviča,
uznaharodžańnie miedalami Kubka i ŭručeńnie samoha trafieju, a taksama pryhožaje kanfieci pad bieśśmiarotnuju muzyku «Kuin».
***
Pieravaha BATE ŭ čempijanacie – biassprečnaja. Mała taho, što kłub upeŭniena lidziruje, ale ŭ 11 matčach nie prapuściŭ nivodnaha hoła. Heta kaža nie tolki pra moc abarony BATE – hetaja linija ŭ kłuba sapraŭdy na ŭzroŭni, ale taksama i biazzubaść atakaujučaj linii supiernikaŭ.
Mała chto siońnia pierad hulnioj sumniavaŭsia ŭ pieramozie BATE. Voś tolki adno niepakoić.
Jak budzie «Tarpieda» pradstaŭlać Biełaruś u Lizie Jeŭropy hetym letam? Z takoj hulnioj tam rabić niama čaho.
