31 maja supracoŭniki ŭpraŭleńnia pa raskryćci ciažkich ekanamičnych złačynstvaŭ HUUS Minharvykankama i adździeła pa baraćbie z ekanamičnymi złačynstvami Maskoŭskaha RUUS stalicy pry siłavoj padtrymcy bajcoŭ pałka milicyi śpiecpryznačeńnia zatrymany na vulicy Biersana 28‑hadovaha raniej sudzimaha minčanina.
Jak paviedamili ŭ adździele infarmacyi i hramadskich suviaziej HUUS, pry nadhladzie ŭ zatrymanaha było znojdziena 11 padroblenych kupiur naminałam 50.000 rubloŭ i 30 — naminałam 20.000 rubloŭ. Padčas vobysku ŭ jaho doma byli znojdzieny dźvie falšyvyja kupiury naminałam 10.000 rubloŭ, dźvie 20‑dołaravyja padroblenyja kupiury, bolš za 300 kampakt‑dyskaŭ parnahrafičnaha źmiestu. Kanfiskavany sistemny błok kampjutera, dva pryntery, skanier.
Zatrymańnie prachodziła niepasredna ŭ momant zbytu padrobak.
U apieratyŭnikaŭ jość usie padstavy mierkavać, što heta była nie pieršaja partyja falšyvak. U pryvatnaści ŭstanoŭlena, što dvuma tydniami raniej jon vyrabiŭ na svajoj arhtechnicy i zbyŭ 14 kupiur naminałam 50.000 rubloŭ, 32 — naminałam 20.000 rubloŭ i dźvie kupiury naminałam 10.000 rubloŭ.
U milicyi ličać, što minčanin sprabavaŭ pašyryć svaju niezakonnuju palihrafičnuju dziejnaść, pra što havorać kanfiskavanyja padroblenyja dołary. Akramia taho, jość padstavy mierkavać, što jon vyrablaŭ padroblenyja dakumienty i zajmaŭsia raspaŭsiudžvańniem dyskaŭ z parnavidea.
Zarablaŭ na žyćcio zatrymany mienavita akazańniem palihrafičnych pasłuh: doma na ŭłasnaj arhtechnicy drukavaŭ vizitnyja kartki. U pole zroku milicyi pavodle padazreńnia ŭ vyrabie falšyvak małady čałaviek trapiŭ jašče ŭ pačatku hoda.
U dačynieńni da padazronaha śledčym adździełam papiaredniaha rasśledavańnia Maskoŭskaha RUUS raspačata sprava na padstavie č. 1 art. 221 Kryminalnaha kodeksa (vyrab, zachoŭvańnie abo zbyt padroblenych hrošaj).