Uskormleny tutejšymi efemami, słuchač nia znojdzie na dysku ni čornych bumeraŭ, ni čarničnych raźbitych sercaŭ, ni dali-čužbinuški, jakija stali ŭvasableńniem masavaj biełaruskaj muzyki bieź biełaruskaha słova. Na dysku tolki biełaruskaje — pa movie, nastroi, idealohii. Heta praŭdzivy tuzin procilehłaściaŭ, jakija imknucca spałučycca, paradaksalna dapoŭnić adna adnu, nia viedajučy słova «farmat». Tamu pobač pieśni pra «nie pajšoŭ nam kłafelin» («Krambambula» — «Turysty») i pra «ciapier za Radzimu adkazvaje kožny z nas» («UltraVožyk» — «Atlantyda»), pra «viecier na tvaich dałoniach» («J_Mopc» — «Tak-cik-tak») i pra «schavaj u mianie svaich sałdat» («Neŭra Dziubel» — «Žyćcio»). Śmiech i hrech, kachańnie i patryjatyzm — usio ŭ adnym «tuzinaŭskim» flakonie. Da ŭsiaho varta adznačyć prahresiŭnaść tuzinaŭcaŭ (Wiecier Mechaniczny, Siarhiej Budkin, Alaksiej Minčonak): adčuvajučy niastaču na biełaruskim rynku ajčynnych kružełak z mp3-zapisami, jany dapoŭnili svoj vynikovy pradukt mehabonusam z tryccacioch piesień akurat u mp3. U mehabonusie datrymany toj samy pryncyp spałučanych supraćlehłaściaŭ. «Tuzin hitoŭ» daŭno staŭ pravobrazam dobraha biełaruskaha muzyčnaha radyjo zaŭtrašniaha dnia. Słuchač ža, nie zvažajučy ni na što, užo paśpieŭ.
