Žychary vioski Šyrokaja na Lidčynie, jakija zmahajucca suprać budaŭnictva škodnaha chimičnaha pradpryjemstva la svaich damoŭ, nie puścili na paroh rajonnaha ideołaha.
Ludzi pratestujuć suprać płanaŭ pastavić za ich harodami zavod haračaha cynkavańnia mietałakanstrukcyj. Im narešcie pačali prychodzić adkazy z roznych instancyj.
Lidski zanalny centr hihijeny i epidemijałohii adkazaŭ, što da 2011 hoda buduć praviedzieny papiarednija pracy pa raspracoŭcy sanitarna‑abarončaj zony i mierkavańni nasielnictva pra budaŭnictva pradpryjemstva ŭličać.
Ź Minpryrody pryjšoŭ adkaz, što budzie praviedzieny analiz miesca dla alternatyŭnaha raźmiaščeńnia pradpryjemstva. Pišuć i pra mahčymaść praviadzieńnia hramadskich słuchańniaŭ.
«Nie vierycca, što jany pryšluć nam niezaležnych ekśpiertaŭ, — kaža Valancina, žycharka Šyrokaj. ‑‑ Znoŭ papryjazdžajuć «akademiki», raskažuć, jak usio biaśpiečna».
Ludzi praciahvajuć źbirać podpisy suprać budaŭnictva zavoda, jaki płanujuć pabudavać za 300 mietrach ad vioski Šyrokaja i za 800 mietraŭ ad Lidy. Na siońnia užo sabrana 2800 podpisaŭ ad žycharoŭ viosak Harni, Šyrokaja, Dalina, Astroŭla i samoj Lidy. Ludzi padpisvajucca achvotna. Ź piacidziesiaci admaŭlajecca adzin‑dva čałavieki, čaściej staryja, jakija bajacca vystupać suprać ułady.
Najbolšaja prablema ŭ tym, što bolšaść lidčukoŭ paprostu nie čuła ni pra zavod, ni pra haračaje acynkavańnie mietału.
Adzinym hramadskim rucham, jaki pavioŭ siabie palityčna ŭ dačynieńni da lidskaj prablemy, stała inicyjatyva «Havary praŭdu». Jaje aktyvisty źbirajuć podpisy z patrabavańniem hramadskich słuchańniaŭ z udziełam usich zacikaŭlenych asobaŭ. Taksama 539 podpisaŭ ad žycharoŭLidčyny było pieradadziena Siarhieju Sidorskamu i Michaiłu Miaśnikoviču z prośbaj dać harantyi, što pradpryjemstva nie budzie pradukavać škodnych vykidaŭ u atmaśfieru i vadu. Jašče adzin list z podpisami rychtujuć da miascovaha deputata. Jaho ž abaviazak ‑‑ baranić intaresy žycharoŭ.
Žychary Harnioŭ i Šyrokaj ščyra radujucca, što ich historyja zacikaviła ludziej i da ich zavitali žurnalisty ź niezaležnych vydańniaŭ i lider «Havary praŭdu» Uładzimir Niaklajeŭ. Akramia žurnalistaŭ i «praŭdalubcaŭ» zavitvała i supracoŭnica ideałahičnaha adździeła rajvykankama. Praŭda, pa pieršym pryjeździe ludzi navat nie puścili jaje na paroh. Tak zavod haračaha acynkavańnia mietału razvarušyŭ niekalki viosak.
