Mytnyja pošliny na naftu i naftapradukty buduć źniatyja dla Biełarusi paśla padpisańnia i ratyfikacyi ź jaje boku ŭsiaho pakieta dakumientaŭ pa stvareńni Adzinaj ekanamičnaj prastory Biełarusi, Rasii i Kazachstana.Pra heta 5 lipienia ŭ Astanie paviedamiŭ žurnalistam vice‑premjer biełaruskaha ŭrada Andrej Kabiakoŭ, pieradaje dziaržaŭnaje infarmacyjnaje ahienctva BiełTA.
Adpaviednaje rašeńnie zamacavana ŭ Pratakole ab asobnych časovych vyklučeńniach z režymu funkcyjanavańnia adzinaj mytnaj terytoryi Mytnaha sajuza, jaki padpisany adnačasova z rašeńniem ab uviadzieńni ŭ dziejańnie Mytnaha kodeksa. Takim čynam, tłumačyć ahienctva, mytnyja pošliny na naftu i naftapradukty dla Biełarusi buduć źniatyja aŭtamatyčna, nie čakajučy, kali dakumienty pa AEP padpišuć i ratyfikujuć Rasija i Kazachstan.
U pratakole taksama zamacavana zachavańnie da 1 lipienia 2011 hoda dziejnych stavak mytnych pošlin na lehkavyja aŭtamabili dla fizičnych asob. Heta značyć ich rehulavańnie nacyjanalnym zakanadaŭstvam pradoŭžana jašče amal na hod. Akramia taho, da 1 lipienia 2011 hoda ŭ Biełarusi zachoŭvajecca nacyjanalny režym rehulavańnia handlu z trecimi krainami.
Jak zajaviŭ 5 lipienia ŭ Astanie pieršy vice‑premjer urada Rasii Ihar Šuvałaŭ, «biełaruski bok pa‑raniejšamu ličyć, što farmavańnie Mytnaha sajuza, adzinaj mytnaj terytoryi viadzie da admieny ekspartnych pošlin va ŭzajemnym handli. Rasijskaja Fiederacyja i Respublika Kazachstan — ja padkreślivaju, što heta nie rašeńnie adnoj Rasijskaj Fiederacyi, na hetym nastojvaje i Respublika Kazachstan — ličać, što da farmiravańnia Adzinaj ekanamičnaj prastory (AEP) i nabyćcia mocy ŭsimi pahadnieńniami, jakija farmirujuć AEP, u kožnaha boku zastajecca prava źbirać ekspartnyja pošliny, pry farmiravańni AEP takich mahčymaściaŭ nie zastaniecca».
Nahadajem, raniej Biełaruś prapanavała Rasii admianić pošliny na naftapradukty ŭ 2010 hodzie, a na naftu — z 1 studzienia 2011 hoda.
