Niahledziačy na sajuznyja damovy z Rasiejaj, Biełaruś palityčnyja i ekanamičnyja sankcyi suprać Hruzii nia ŭvodzić. U biełaruskich kramach volna pradajucca hruzinskija viny, mineralnyja vody, harbata. Ź Miensku ŭ Tbilisi lotajuć samaloty. Ministerstva zamiežnych spravaŭ Biełarusi nia dumaje, što ŭviadzieńnie vizavaha režymu z aficyjnym Tbilisi metazhodnaje. Padčas pajezdak u hetuju kaŭkaskuju krainu ad biełarusaŭ nie patrabujuć navat štampu ŭ pašparcie, jaki dazvalaje vyjezd ź Biełarusi za miažu.
Niahledziačy na roznyja palityčnyja pryjarytety ŭładaŭ Hruzii i Biełarusi, ekanamičnyja suviazi, jak kažuć u MZS Biełarusi, padtrymlivajucca na «prymalnym uzroŭni». Zachavanyja transpartnyja stasunki pamiž krainami. Raz na tydzień, u paniadziełki, «Biełavija» vykonvaje paloty ź Miensku ŭ Tbilisi.
U Dziaržaŭnym pamiežnym kamitecie zapeŭnili, što nijakich techničnych składanaściaŭ z pajezdkami ŭ Hruziju biełarusy mieć nie pavinny.
(Supracoŭnik pamiežnaha kamitetu: ) «Sapraŭdny nacyjanalny pašpart, i ŭsio. Z našaha boku, ad pamiežnikaŭ, patrabujecca tolki heta, my praviarajem sapraŭdnaść pašpartu. Adznaka šmatrazovych vyjezdaŭ u Hruziju nie patrebnaja. Miarkuju, paśla prylotu ŭ Hruziju nijakich prablemaŭ uźniknuć nie pavinna, kali ŭ vas sapraŭdny pašpart hramadzianina Respubliki Biełaruś».
Darečy, u ambasadzie Hruzii ŭ Maskvie paćvierdzili, što niekatoryja hramadzianie hetaj kaŭkaskaj krainy, jakija va ŭmovach transpartaj blakady nia mohuć adlacieć u Tbilisi z Rasiei, vymušanyja karystacca pasłuhami biełaruskich avijapieravozčykaŭ. Prynamsi, mienskaje lotnišča – adzinaja blizkaja da Rasiei terytoryja, adkul realna trapić u Hruziju pavietram.
U svaju čarhu, hruzinski dyplamat Hreho Katamadze pierakanany: žadańnie Rasiejskaj Federacyi pakarać Hruziju praz ekanamičnyja sankcyi adabjecca pieradusim na šarahovych spažyŭcach u Rasiei.
(Katamadze: ) «Nia tolki Hruzija prajhraje ad taho, što zakryli rasiejski rynak ad usiaho hruzinskaha. Ad usiaho absalutna! Kali b zabaranili da ŭvozu tolki vino ci jašče štości, zrazumieć možna. Ale zabaranili ŭsio! Inšymi słovami, pačali pazbaŭlać svaich ža hramadzianaŭ naturalnaha hruzinskaha praduktu. Ci heta možna ličyć narmalovym? Miarkuju, što nie».
Adrozna ad rasiejskich kalehaŭ, biełaruskija sanitarna-epidemijalahičnyja słužby nie znajšli nijakaj «atruty» ŭ hruzinskich vinach – samyja roznyja hatunki ad viadomych vytvorcaŭ možna nabyć praktyčna ŭ kožnaj charčovaj kramie. Taksama nia vyjaŭlena pabočnych rečyvaŭ u znakamitaj mineralnaj vadzie «Baržomi». Jašče adzin charčovy brend Hruzii – zialonaja i bajchavaja harbata – hetaksama maje volny dostup na biełaruskija pryłaŭki.
Va ŭmovach «adekvatnych kontrazachadaŭ» nia tolki hramadzianie Hruzii adčuvajuć dyskamfort na terytoryi Rasiei. Rasiejskija turysty ŭ ahladnaj perspektyvie mohuć stać «niepažadanymi» na papularnych čarnamorskich kurortach Hruzii. Darečy, hruzinski kirunak upieršyniu paśla savieckaha času nabyvaje papularnaść u biełarusaŭ. Jak skazaŭ adzin z turaperataraŭ, biełaruskija firmy raźličvajuć na abiacańnie prezydenta Michaiła Saakašvili da 2007 hodu ŭparadkavać usie kurorty ŭ krainie. Biełarusy spadziajucca adnavić koliś papularnyja maršruty: Batumi, Suchumi, Picundu, Hahry. Pryčym, planujecca kultyvavać mienavita «hruzinski turyzm», nie vydzialajučy asobna Adžaryi ci Abchazii.
Siońnia rasiejskija pravaabaroncy, siarod jakich Alena Boner, staršynia Maskoŭskaj Chelsynskaj hrupy Ludmiła Alaksiejeva, pradstaŭniki ruchu «Za pravy čałavieka» pačali źbirać podpisy suprać antyhruzinskaj kampanii. Jany rasceńvajuć zachady rasiejskich uładaŭ «jak padbuchtorvańnie da ahresiŭnaj vajny». «Sankcyi na ŭvoz hruzinskaha vina i mineralnyj vady, transpartnaja blakada, zabarona na hrašovyja pieravody skiravanyja najpierš suprać šarahovych hramadzianaŭ i majuć vyrazny charaktar kalektyŭnaha pakarańnia», – śćviardžajuć pravaabaroncy j kažuć, što heta nie adpaviadaje namieram rasiejskaha kiraŭnictva «pastavić na miesca aŭtarytarny režym».
