U 2011 hodzie vyjduć pieršyja dva tamy zboru tvoraŭ kłasika biełaruskaj litaratury Uładzimira Karatkieviča z 25 tamoŭ.
Pra heta paviedamiŭ BiełaPAN navukovy kiraŭnik vydańnia, aŭtar ustupnaha artykuła da zboru i adzin ź jaho składalnikaŭ, kandydat fiłałahičnych navuk Anatol Vierabiej.
Pavodle jaho słoŭ, paezija Karatkieviča budzie źmieščana ŭ dvuch tamach, pryčym da druhoha toma miarkujecca prykłaści kampakt-dysk «Vieršy i pieśni Uładzimira Karatkieviča ŭ aŭtarskim vykanańni». U treci tom uvojduć kazki i apaviadańni, u čaćviorty i piaty — lehiendy i apovieści, u šosty — raman «Nielha zabyć», u siomy i vośmy — raman «Kałasy pad siarpom tvaim», u dzieviaty — raman «Chrystos pryziamliŭsia ŭ Harodni», u dziesiaty — raman «Čorny zamak Alšanski». Akramia taho, zapłanavana vydańnie tomu dramaturhii, dvuch knih publicystyki, eseistyki i krytyki, dvuch tamoŭ epistalarnaj spadčyny, knihi pierakładaŭ i aŭtapierakładaŭ, toma malunkaŭ piśmieńnika, a taksama troch knih scenaryjaŭ i libreta. U 25-tomnik taksama ŭvojduć dziońniki, zapisnyja knižki, darčyja nadpisy, dapaŭnieńni papiarednich tamoŭ zboru, letapis žyćcia i tvorčaści Karatkieviča. Tamy publicystyki, eseistyki i krytyki buduć dapoŭnieny kampakt-dyskam z aŭdyjozapisami vystupleńniaŭ piśmieńnika.
«My žadajem jak maha paŭniej vydać tvorčuju spadčynu Karatkieviča z pašyranym navukovym kamientaryjem», — adznačyŭ litaraturaznaŭca. Jon zrobić zachady, kab hetaje vydańnie padtrymali adpaviednyja dziaržaŭnyja struktury.
Pavodle słoŭ navukoŭcy, vydańnie rychtujecca na kafiedry biełaruskaj litaratury i kultury Biełaruskaha dziaržuniviersiteta. Vychad apošniaha toma zapłanavany na 2020 hod, kali budzie adznačacca 90-hodździe z dnia naradžeńnia Uładzimira Karatkieviča.
BiełaPAN
Chočaš padzialicca važnaj infarmacyjaj ananimna i kanfidencyjna?
Pišycie redaktaru «Našaj Nivy» ŭ TH
