Novamu niamieckamu pasłu ŭ Miensku pryjdziecca apraŭdvacca 2

A byłoha pasła Vajsa adpravili na piensiju. Piša ŭ svaim błohu Śviatłana Kalinkina.

Prybyŭ novy ambasadar Niamieččyny Krystaf Vajla, i jon užo paśpieŭ vydać kopii davierčych listoŭ ministru zamiežnych spraŭ Siarhieju Martynavu.

22 červienia, kali ŭ hadavinu pačatku vajny były ambasadar Niamieččyny Hiebchard Vajs ładziŭ raźvitalny pryjom, pradstaŭniki našaha MZS nie chavali, što ich vielmi zasmučaje adjezd čałavieka, tak šmat zrabiŭ dla narmalizacyi adnosin

pamiž Biełaruśsiu, Hiermanijaj i Jeŭropaj u cełym.

Navat ministr zamiežnych spraŭ Siarhiej Martynaŭ napaŭinkohnita zazirnuŭ na hetaje mierapryjemstva, kab bieź mikrafona, asabista skazać Vajs słovy padziaki. A pradstaŭniki dypkorpusa tym časam pierašeptvałasia i budavali roznyja viersii, čamu zaciahvajecca vydača ahremana novamu kandydatu ŭ ambasadary Krystafu Vajlu.

Proźvišča Vajla ŭ jakaści mahčymaha kiraŭnika dypmisii Niamieččyny ŭ Miensku ŭspłyła jašče ŭ traŭni, niamiecki MZS padrychtavaŭ usio, kab kresła ambasadara ŭ Miensku nie pustavała. Ale hetaja kandydatura nie całkam zadavalniała hałoŭnych ludziej u Čyrvonym domie z toj prostaj pryčyny, što ŭ Vajla vialiki dośvied pracy z amierykancami i NATO, a nie z demakratyjami typu siarednieazijackich.

Krystaf Vajla skončyŭ dypłamatyčnuju akademiju dla padrychtoŭki da dypłamatyčnaj słužbie vyšejšaha ranhu ŭ Bonie. U 1985–1986 hadach pracavaŭ u adździele pa spravach Bierlina i Hiermanii ŭ Fiederalnym ministerstvie zamiežnych spraŭ. U 1986—1989 hh. — u ambasadzie FRH u Maskvie. Abjadnańnie Hiermanii sustreŭ u jakaści supracoŭnika niamieckaj ambasady ŭ Brazilii. U 1991—1994 hh. pracavaŭ u Adździele NATO Fiederalnaha ministerstva zamiežnych spraŭ, 1994–1997 — u ambasadzie ŭ Varšavie. Paźniej — u Štabie płanavańnia ministerstva zamiežnych spraŭ, u Mižnarodnym sakrataryjacie NATO ŭ Bruseli. U 2003—2007 hh. — Kiraŭnik Adździeła jeŭrapiejskaj palityki biaśpieki i abarony Fiederalnaha ministerstva zamiežnych spraŭ, prachodziŭ staž u ZŠA Narvard Fellows Program (Kiembrydž). Adrazu paśla hetaha ŭznačaliŭ pasolstva Hiermanii ŭ Bahdadzie.

Hałoŭnaja intryha fihury doktara Vajla — ci voźmie jon na siabie rolu advakata djabła, jak heta zrabiŭ jaho papiarednik. Hiebchard Vajs nastolki adznačyŭsia na nivie abarony demakratyčnych kaštoŭnaściaŭ, što mnohija apazicyjnyja lidery prosta pierastali ź im vitacca. Aficyjnyja ŭłady, naadvarot, składajuć jamu paniehiryk.

Chacia naŭrad ci mienavita na Vajs lažyć adkaznaść za praźmierny aptymizm jeŭrapiejskaj realpolitik u dačynieńni da biełaruskaha kiraŭnictva. Pierahlad Hiermanijaj svaich padychodaŭ da biełaruskaha pytańnia ŭ abmien na abiacańni pastupovych pieramienaŭ zdaryŭsia jašče da jaho.

Prynamsi, u apošnim numary Časopisa mižnarodnaha prava i mižnarodnych adnosin, jaki vydajecca ŭ Biełarusi, pačatak pierahladu adnosinaŭ datujucca kancom 2004 — pačatkam 2005 hoda, i heta niahledziačy na toje, što napiaredadni prezidenckich vybaraŭ-2006 najvyšejšyja słužbovyja asoby Hiermanii pryniali abodvuch kandydataŭ apazicyi — i Alaksandra Milinkieviča, i Alaksandra Kazulina — byccam by, prademanstravaŭšy tym samym salidarnaść i padtrymku biełaruskaj apazicyi.

U toj ža čas praŭładnyja palitołahi-mižnarodniki ščyra kanstatujuć, što mienavita Niamieččyna pravodziła aktyŭnyja pieramovy ź bližejšymi susiedziami Biełarusi — Polščaj i Litvoj — pa biełaruskaj prablematycy. A hałoŭnaja zasłuha Hiermanii — u tym, što Jeŭrasajuz nie staŭ uvodzić u dačynieńni da Biełarusi ekanamičnyja sankcyi paśla prezidenckich vybaraŭ 2006 hoda, chacia vyniki vybaraŭ i nie pryznaŭ.

Napiaredadni novych prezidenckich vybaraŭ u našaj krainie Jeŭropa i ZŠA znoŭ pačynajuć dyskusiju ab metazhodnaści ŭviadzieńnia ekanamičnych sankcyj, kali vybary projduć pa starych scenarach (a mała chto sumniavajecca, što budzie pa-inšamu). Amierykanskaje vydańnie The American Interest Online apublikavała artykuł Devida Krejmiera, byłoha namieśnika pamočnika Dziaržsakratara pa spravach Rasii, Ukrainy, Biełarusi i Małdovy i Dejmana Uiłsan, byłoha dyrektara adździeła krainy Uschodniaj i Centralnaj Jeŭropy Rady nacyjanalnaj biaśpieki ZŠA, u jakoj dakazvajecca efiektyŭnaść sankcyj u dačynieńni da Biełarusi.

Pazicyja Hiermanii i pavodziny byłoha ambasadara hetaj krainy Hiebcharda Vajsa padvierhnutyja rezkaj krytycy. Arhumienty tych, chto vykazvaje zaniepakojenaść tym, što sankcyi z boku ES pryviaduć Biełaruś u abdymki Rasiei, aŭtarytetnyja amierykanskija ekśpierty nazyvajuć «iłžyvaj zakłapočanaściu». I kanstatujuć, što ŭsiodaravańnie ES u adnosinach Mienska pryviało nie da prahresu, a da paharšeńnia situacyi, piša ŭ svaim błohu Śviatłana Kalinkina.

Lejtmatyŭ artykuła — treba dadušyć apošniuju dyktaturu i nie varta bajacca taho, što ciapier užo Jeŭropa i ZŠA mohuć heta zrabić z dapamohaj Maskvy.

Vidavočna, što

dyskusija pamiž ZŠA i JeC ab sankcyjach u dačynieńni da Biełarusi tolki pačynajecca, i Hiermanii ŭ joj, miarkujučy pa ŭsim, pryjdziecca apraŭdvacca. Były ambasadar Hiebchard Vajs paśla mienskaj misii pakinuŭ šerahi supracoŭnikaŭ Fiederalnaha ministerstva zamiežnych spraŭ i adpraŭleny na piensiju. A voś ź jakoj misijaj prybyŭ Krystaf Vajl, stanie zrazumieła ŭžo vosieńniu.

skalinkina.livejournal.com

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH