Spadarynia Čžan Iń vartaja 3,4 młrd dalaraŭ, jakija jana zarabiła na ŭtylizacyi amerykanskaha śmiećcia.
Nikomu nie viadomaja kitajanka ŭ try razy bahaciejšaja za aŭtarku «Hary Potera». Jana –najbahaciejšaja žančyna śvietu siarod tych, chto sam nažyŭ svajo bahaćcie.
Majomaść kitajskaj biznesvumen aceńvajecca ŭ 3,4 młrd dalaraŭ. Jana maje 72% udziełu ŭ firmie pa ŭtylizacyi śmiećcia, što katyrujecca na biržy ŭ Hankonhu. Čžan Iń znachodzicca na pieršym miescy ŭ abvieščanym na minułym tydni śpisie 500 najbahaciejšych kitajcaŭ. Ich sukupnaja majomaść aceńvajecca ŭ 138 młrd dalaraŭ.
Śpis składaje brytanski finansavy daradca Rupert Huhverf, jaki žyvie ŭ Šanchai. Kab trapić u hety śpis, treba mieć prynamsi 6 młn dalaraŭ hadavoha prybytku. Siaredni kitajec maje ŭ hod 1200 dalaraŭ.
Pra najbahaciejšuju kitajanku viadoma niašmat. Jana naradziłasia 49 hod tamu u Mańčžuryi. U maładości vyjechała ŭ brytanski Hankonh, vyjšła zamuž za kitajca z Tajvaniu. Maje amerykanski pašpart i razbahacieła na amerykanskim śmiećci. Jana skuplaje ŭ ZŠA papieru i kardon, a paśla na svaich fabrykach utylizacyi śmiećcia pierarablaje ich na pakunki. Jašče hod tamu Čžan Iń była na 36-m miescy ŭ śpisie miljarderaŭ. Za hety čas jaje firma ŭvajšła na biržu ŭ Hankonhu i pavialičyła svaju vartaść na 165%.
U minułym hodzie samym bahatym kitajcam byŭ pryznany Chvan Huanju, uładalnik GOME, sietki prodažu elektraabstalavańnia. Sioleta jon apynuŭsia na druhim miescy. Chvan u maładości kinuŭ škołu i skočyŭ u "mora biznesu" – pradavaŭ radyjo i elektryčnyja drobiazi na chodniku. Čałaviek, majomaść jakoha aceńvajecca ŭ 2,5 młrd dalaraŭ, žyvie z žonkaj i dźviuma dočkami ŭ ścipłaj kvatery ŭ adnym z pekinskich mikrarajonaŭ. Jon ličyć za lepšaje nie afišavać svajo bahaćcie zhodna z kitajskaj maksymaj: bahatyja bajacca vystaŭlać siabie na ludzi tak, jak śvińni bajacca pataŭścieć.
«Typovy kitajski biznesoviec pachodzić ź vioski, čaściakom nia maje siaredniaj adukacyi, a biznes raskruciŭ dziakujučy pazykam svajakoŭ. Heta pieršaje pakaleńnie pradprymalnikaŭ», – raspaviadaje Huhverf.
Śpis 500 miljarderaŭ – vialikaja dapamoha dla analitykaŭ, jakija nazirajuć za nieprazrystaj kitajskaj ekanomikaj. Źmieny ŭ śpisie adbyvajucca vokamhnienna. Z 1999 h. u im zastałosia da siońniašniaha dnia tolki dzieviać proźviščaŭ. Ćmianyja kitajskija zakony i ŭsiomahutnaść kiraŭnikoŭ – voś pryčyna taho, što možna chutka jak nažyć bahaćcie, tak i stracić jaho. Miesiac tamu byŭ aryštavany zabudoŭščyk Žanh Ronhkun – numar 16 ź letašniaha śpisu, zabłytany ŭ vializnaj afery z rastrataj 400 młn pensijnaha fondu Šanchaju. Užo aryštavanyja dziasiatki padazravanych.
