Archivy Biełarusi, Ukrainy, Litvy i Polščy stvarajuć infarmacyjna-pošukavuju systemu pa rodzie Radziviłaŭ. Meta prajektu – ŭźjadnańnie ŭ infarmacyjna-pošukavaj systemie niekali viadomaha niaśviskaha archiŭnaha kompleksu. Zapačatkavany prajekt byŭ u 2001 hodzie ŭ Varšavie na naradzie pa realizacyi prajektu «Archiŭ rodu Radziviłaŭ», na jakoj pradstaŭniki bakoŭ padpisali pratakoł pra supracoŭnictva.
«Pratakoł praduhledžvaje na padstavie mižnarodnaha standartu vopisu ISAD stvareńnie adzinaj aŭtamatyzavanaj infarmacyjna-pošukavaj systemy pa archivie rodu Radziviłaŭ», – patłumačyła Ała Hałubovič, kiraŭnica Nacyjanalnaha histaryčnaha archivu Biełarusi. Na pieršym etapie kožnaja kraina pavinna staryć svaju infarmacyjna-pošukavuju systemu pa dakumentach rodu Radziviłaŭ. Druhi etap praduhledžvaje abmien kopijami dakumentaŭ na parytetnych pačatkach, treci – padbor dakumentaŭ dy ich aličboŭvańnie.
U archivie Biełarusi znachodziacca bolš za 26 tysiač dakumentaŭ kniazioŭ Radziviłaŭ, pieršyja ź jakich datujucca XIV stahodździem, apošnija – 1939 hodam. Druhaja bujnaja častka materyjałaŭ znachodzicca ŭ Hałoŭnym archivie staradaŭnich aktaŭ u Varšavie. Nievialikuju kolkaść dakumentaŭ majuć archivy Litvy i Ŭkrainy.
U hetych čatyroch krainach zachoŭvajucca hramaty, dakumenty nakont kiravańnia majontkami, pierapiska Radziviłaŭ pa słužbovych, vajskovych, asabistych pytańniach, a taksama radavodnyja knihi, hienealahičnyja tablicy, daroŭnyja, testamenty dy inšyja dakumenty. Jany pieršapačatkova zachoŭvalisia ŭ niaśviskim archivie, stvoranym u 1551 hodzie adnym z kniazioŭ mahnackaha rodu.
Radziviły – adzin z najbujniejšych mahnackich rodaŭ Eŭropy, pradstaŭniki jakoha ciaham doŭhich hadoŭ zajmali vysokija dziaržaŭnyja pasty ŭ Vialikim Kniastvie Litoŭskim i Rečy Paspalitaj, ihrali pieršyja roli ŭ palityčnym, sacyjalna-ekanamičnym i kulturnym žyćci.
Fota ź Vikipedyi
