Žychary Bresta Siamion i Iryna Dziačok, 2 kastryčnika zatrymanyja hruzinskaj palicyjaj za niezakonnaje znachodžańnie ŭ Abchazii, vyzvalenyja pa rašeńni suda, paviedamlaje BiełaPAN.
Pa słovach Siamiona, jany z žonkaj adčuvajuć siabie narmalna. "Ułady Hruzii pastavilisia da nas pabłažliva i prysudzili adzin hod umoŭna", -- raspavioŭ jon. Spačatku Dziačkoŭ chacieli pakarać štrafam. "Ale my skazali, što nie majem mahčymaść jaho zapłacić, pakolki małamajomasnyja. Prykładna praź miesiac buduć hatovyja nieabchodnyja dakumienty, i my zmožam pakinuć Hruziju", - paviedamiŭ Siamion.
Pa słovach Dziačaka, meta ich padarožža z žonkaj Irynaj - pałomnictva: "My - pravasłaŭnyja vierniki, chacieli naviedać śviatyja miescy ŭ Abchazii, Hruzii, Turcyi, Siryi i Jehipcie".
Paśla amal trochtydniovaha znachodžańnia ŭ turmie, jany, mahčyma, źmieniać płany. "My stamilisia i paźniej vyrašym, ci praciahvać padarožža", - skazaŭ Dziačok. U čakańni afarmleńnia dakumientaŭ, nieabchodnych dla vyjezdu z Hruzii, jany buduć žyć u manastyry.
Jak paviedamiŭ pres-sakratar biełaruskaha źniešniepalityčnaha viedamstva Andrej Savinych, "MZS Biełarusi padklučyŭsia da vyrašeńnia prablemy, źviazanaj z zatrymańniem biełaruskich hramadzian, adrazu paśla atrymańnia infarmacyi pa hetaj spravie, jašče ŭ pačatku kastryčnika". Hruzinski bok, pa jaho słovach, "prajaviła vysokuju stupień kanstruktyvizmu ŭ urehulavańni dadzienaha pytańnia".
Pres-sakratar adznačyŭ, što Hruzija "razhladaje ŭjezd na terytoryju Abchazii ź luboj inšaj terytoryi, akramia terytoryi samoj Hruzii, jak kryminalnaje złačynstva, jakoje praduhledžvaje pakarańnie ŭ vyhladzie pazbaŭleńnia voli na termin ad dvuch da čatyroch hadoŭ".
