Cud nad Źmitrom Daškievičam raspačniecca 30 kastryčnika ab 11-j hadzinie. Jon budzie prachodzić u zakrytym režymie. Spravu maje razhladać namieśnica staršyni sudu Kastryčnickaha rajonu Miensku sudździa Ała Bułaš.
Pravaabaroncy majuć svoj pohlad na matyvacyju zakrytaści budučaha sudu. Heta niežadańnie hramadzkaha rozhałasu i afišavańnia siońniašnich śledčych technalohijaŭ, što praktykujuć biełaruskija pravaachoŭniki ŭ dačynieńni da palityčnych apanentaŭ uładaŭ. Tym nia mienš, pravaabaroncy, siabry i paplečniki Z. Daškieviča zaklikajuć usich nieabyjakavych da salidarnaści z palitviaźniem i prapanujuć pryjści 30 kastryčnika da budynku sudu na vulicy Siamaški, 33, kab padtrymać jaho.
Aryštavali Źmitra 15 vieraśnia, kali jon razam z advakatam źjaviŭsia na dopyt u prakuraturu. Zdaryłasia heta paśla jaho viartańnia z Mahilova, dzie sustreču miascovych moładzievych aktyvistaŭ pierarvaŭ specnaz. Chłopca abvinavacili va ŭdziele j kiravańni niezarehistravanaj arhanizacyjaj Małady Front.
Pavodle artykułu 193 č.1 Kryminalnaha kodeksu, jamu pahražaje da dvuch hadoŭ pazbaŭleńnia voli. Paśla aryštu jaho źmiaścili ŭ SIZA Miensku pa vuł.Vaładarskaha, nia hledziačy na toje, što dadzieny artykuł nie praduhledžvaje ŭtrymańnia pad vartaj da sudu: maładoha čałavieka paličyli niebiaśpiečnym dla hramadztva. 21 vieraśnia jamu było vysunutaje aficyjnaje abvinavačańnie.
Z Vaładarki Źmicier dasyłaje listy. Z adnaho ź ich stała viadoma, što jamu nie pieradali Bibliju, na što chłopiec pahražaŭ raspačać haładoŭku. Bibliju jamu ŭrešcie dazvolili, ale vyśvietliłasia, što ŭ adnoj ź im kamery znachodziacca chvoryja na suchoty, hiepatyt i jość adzin VIČ-infikavany čałaviek.
