Što staić za ŭltymatumam biełaruskich baskietbalistak?
Praź niekalki tydniaŭ paśla viartańnia z čempijanatu śvietu 2010 u Čechii, dzie našy dziaŭčaty siensacyjna zaniali 4-je miesca (a mahli ž i 2-je ŭziać!), nacyjanalnaja žanočaja zbornaja pa baskietbole vystupiła z adkrytym listom.
«Žachlivy ŭzrovień arhanizacyi, ułaścivy spravam u adnosinach da zbornaj u apošnija hady vymusiŭ nas zadumacca pra metazhodnaść dalejšych vystupaŭ za nacyjanalnuju kamandu»,— adznačajecca ŭ liście. — «Hulać na hołym entuzijaźmie možna hod, paŭtara, dva, ale nijak nie na pastajannaj asnovie». U svaim zvarocie baskietbalistki akcentujuć uvahu na najbolš pryncypovych momantach: adsutnaść bazy dla praviadzieńnia paŭnavartasnych zboraŭ, prablemy ź jakasnaj ekipiroŭkaj u naležnaj kolkaści i adpaviedna siezonam hoda, a taksama pytańnie najaŭnych hrošaj.
Ultymatum biełaruskich baskietbalistak choć i staŭ dosyć niečakanym, zvažajučy na ažyjataž, vyklikany fienamienalnym pośpiecham u Čechii, ničoha novaha ŭ sabie nie toić. Bazu dla zboraŭ kamanda prosić nie pieršy hod.
«Svaim vynikam my dakazali, što majem prava na isnavańnie»,— zaklikała čynoŭnikaŭ paviarnucca tvaram da baskietbołu kapitan zbornaj Natalla Trafimava pa viartańni z Čechii. Razmovy pra ekipiroŭku viaducca ci nie z časoŭ tryjufmu ŭ Italii, dzie ŭ 2007 hodzie naša zbornaja stvaryła sapraŭdnuju siensacyju, uziaŭšy «bronzu». Užo tady dziaŭčaty kazali pra nieabchodnaść nabyćcia jakasnaj formy ad suśvietnych brendaŭ, ale jak apranalisia ŭ formu ad litoŭskaj firmy Tuta, tak i apranajucca. Hrošy, hrošy.
Dahetul z hałavy nie vychodzić taki fakt: trenier Anatol Bujalski zarabiŭ padčas pieramožnaj Jeŭropy-2007 ažno 200 tysiač. Ale niachaj supakojacca zajzdrośniki — havorka nie pra jeŭra i dalary, a pra našyja rodnyja biełaruskija rubli.Sioleta kožnaja baskietbalistka zbornaj atrymała ad fiederacyi baskietbołu pa 4,5 tysiačy dalaraŭ. Niakiepska? Ale ŭ susiedniaj Rasii, jak kaža naša ziamlačka Alena Švajbovič, u premjer-lizie za adnu pieramohu možna zarabić bolš.
Jak bačym, ahučanyja ŭ liście prablemy źjavilisia nie siońnia. Pra ich pisałasia i havaryłasia nie raz i nie dva. Dyk čamu ž tady sprava nie rušycca ź miesca? Čamu zbornaja, jakaja dasiahnuła takich vyšyniaŭ nasupierak usiamu, dahetul nie maje minimalnaj naležnaj padtrymki z boku dziaržavy? Zdavałasia b, natchnionyja takim pośpiecham čynoŭniki ad sportu musiać jaho raźvivać i zamacoŭvać.
Baskietbolnyja siekcyi možna arhanizavać u luboj škole, što maje spartzału.Jak i handboł, jakim biełarusy słavilisia nie tak i daŭno. I valejboł. Tym bolš, što hetyja vidy sportu nie patrabujuć vielizarnych układańniaŭ, jak u vypadku z sportam №1 u Biełarusi. Naturalna, ničoha kiepskaha niama ŭ tym, kab budavać ladovyja areny, ale ci patrebnyja jany ŭ takoj kolkaści?
Kolki maleńkich žycharoŭ Drahičyna i Ivacevičaŭ buduć stała zajmacca chakiejem u miascovych pałacach pry košcie kamplekta formy ad $400?Ci akupajucca takija abjekty, bo što kazać pra Drahičyn ź Ivacevičami, kali ŭžo navat baranavicki ladovy pałac mienš čym praz hod paśla zdačy ŭ ekspłuatacyju puścili z małatka z pryčyny miljardnych zapazyčanaściaŭ?
Zrešty, hetaja vidavočnaja ekanamičnaść baskietbołu i moža być adnoj z pryčyn čynoŭnickaj abyjakavaści. A što, novaja baskietbolnaja placoŭka — heta nie ladovy pałac, na pabudovie jakoha možna zasvoić fantastyčnyja srodki... Akramia taho,
prykład kamandy Bujalskaha moža vyklikać jašče i razdražnieńnie. U areny hrošy ŭbuchali, a chakiej naš pa-raniejšamu na hłybokim padjomie. A tut na sumiesi hołaha entuzijazmu z patryjatyzmam naradžajecca kamanda, zdolnaja dasiahać viaršyniaŭ bieź jakoj-kolviek dapamohi z boku spartyŭnych čynoŭnikaŭ. Mohuć uźniknuć pytańni: a navošta tady tyja ŭlivańni ŭ pryvilejavanyja vidy sportu, dy ŭłasna sami čynoŭniki?
