Źmianiajucca niekatoryja ŭmovy pastanoŭki na ŭlik dla palapšeńnia žyllovych umoŭ

Z 1 studzienia 2011 hoda ŭ Biełarusi źmianiajucca niekatoryja ŭmovy pastanoŭki na ŭlik hramadzian, jakija majuć patrebnaść u palapšeńni žyllovych umoŭ.

Pra heta paviedamiła na pres-kanfierencyi 1 listapada načalnik upraŭleńnia jurydyčnaj pracy i kadraŭ Ministerstva žyllova-kamunalnaj haspadarki Natalla Kačan, kamientujučy ŭkaz prezidenta № 552 ad 27 kastryčnika 2010 hoda.

Tak, dla pastanoŭki na ŭlik hramadzian uličvajecca mietraž žyłpłoščy nie tolki peŭnaha hramadzianina, jaki žadaje stać na ŭlik, ale i žyłpłoščy, što znachodzicca va ŭłasnaści členaŭ jaho siamji, jakija žyvuć razam ź im. Naprykład, piać čałaviek pražyvaje ŭ kvatery płoščaj 50 kv. m. Zabiaśpiečanaść składaje 10 kv. m, a na ŭlik stanoviacca pry zabiaśpiečanaści 15 kv. m. Na ŭlik žadajuć stać dva čałavieki, adnak u adnaho z členaŭ siamji jość va ŭłasnaści jašče kvatera 60 kv. m. Tady pry pastanoŭcy budzie ŭličvacca i heta žyłpłošča. Heta značyć uzrovień zabiaśpiečanaści budzie ŭžo 22 kv. mietry na čałavieka.

Akramia taho, rastłumačyła śpiecyjalist, z padstavy dla pastanoŭki na ŭlik hramadzian, jakija naradzili ci jakija ŭsynavili dziaciej, vyklučajucca raźviedzienyja, jakija zabiaśpiečany žyłpłoščaj bolš za vyznačany paroh u 15 kv. mietraŭ na čałavieka. «Heta norma vyklučana ŭ suviazi z tym, što hramadzianie złoŭžyvali takim stanoviščam i razvodzilisia fiktyŭna», — rastłumačyła Kačan. Jana pryviała prykład pražyvańnia siamji z troch čałaviek u trochpakajovaj kvatery płoščaj kala 100 kv. m. «Baćki raźvialisia i nivodzin ź ich nie maje prava stać na ŭlik dla palapšeńnia žyllovych umoŭ, jak heta było dazvolena raniej», — rastłumačyła Kačan.

Taksama ŭviedziena norma, pavodle jakoj hramadzianam, jakim vydzieleny ziamielny ŭčastak pa-za aŭkcyjonam u abłasnych haradach dla budaŭnictva indyvidualnaha žylla, nie majuć prava adnačasova ŭstupać u ŽBK dla budaŭnictva lhotnaha žylla i naadvarot. Hramadzianin, jaki maje patrebnaść u palapšeńni žyllovych umoŭ, pavinien vybrać tolki adzin sa sposabaŭ palapšeńnia žyllovych umoŭ.

Ukazam taksama ŭdakładniajucca normy pastanoŭki na ŭlik dziaciej-sirot, maładych śpiecyjalistaŭ i rabočych, žycharoŭ sielskich nasielenych punktaŭ, udakładniajecca termin «niepracazdolny».

Śpiecyjalist adznačyła, što «novyja normy pryviaduć da skaračeńnia čarhi hramadzian, jakija majuć patrebnaść u palapšeńni žyllovych umoŭ». Pavodle jaje słoŭ, na 1 studzienia 2010 hoda ŭ hetaj čarzie stajać 793 tys. 140 čałaviek, u tym liku ŭ Minsku kala 270 tys. čałaviek. Letaś palepšyła svaje žyllovyja ŭmovy 41 tysiača čałaviek. Kačan taksama adznačyła, što «čakajecca napłyŭ zajaŭ dla pastanoŭki na ŭlik tych katehoryj hramadzian, jakija hublajuć heta prava z novaha hoda».

0

0

0

0

0

0

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH