Pryznańniami ŭ kachańni na asfalcie ciažka kahości ździvić. Heta ŭžo nieadjemnaja častka haradskoj kultury. Zaŭsiody chtości kahości kachaje i choča paviedamić pra svaje pačućci vialikimi litarami na samym bačnym miescy.
Nadpis na vulicy Charužaj «Mark, ja lublu ciabie. Aleh», z adnoha boku, adno ź dziesiatkaŭ padobnych pryznańniaŭ, ničym nie lepšaje i nie horšaje za inšyja. Z druhoha, dva mužčynskich imieni vyklikajuć ździŭleńnie.
Ci nasamreč, hiei ŭ našaj stalicy nie mieniej adkrytyja i śmiełyja ŭ svaich pryznańniach za hietieraseksuałaŭ?
Kab razabracca ŭ situacyi, my pazvanili pradstaŭniku inicyjatyvy «Hiej-Biełaruś» Siarhieju Pradziedu:
«NN»: Padobnyja nadpisy -- sapraŭdnyja pryznańni ŭ kachańni hiejaŭ ci vašaja akcyja?
SP: Heta byŭ nievialiki fłeš-mob, pryśviečany Dniu Kaminh-aŭta (ad anhł. coming out — dzień dobraachvotnaha raskryćcia svajoj sieksualnaj aryjentacyi), jaki adbyŭsia jašče 11 kastryčnika.
«NN»: Vy vyrašyli pierajmać vopyt palityčnych hrafici? Ci adkul źjaviłasia takaja ideja?
SP: Nie. Nasamreč usio pačałosia z taho, što ja pakinuŭ taki nadpis chłopcu, jaki mnie padabajecca. I jon vielmi pakryŭdziŭsia. Tady ŭ Dzień Kaminh-aŭtaŭ my ź siabrami prydumali zrabić šerah padobnych nadpisaŭ z mužčynskimi i žanočymi imionami, kab pakazać, što ŭ hetym niama ničoha drennaha.
«NN»: A čamu pakryŭdziŭsia chłopiec, jakomu ty pryznaŭsia ŭ kachańni?
SP: Heta niepryjemnaja dla mianie historyja. Jon pieražyvaŭ, što adziny z takim imiom žyvie ŭ hetym padjeździe i nadpis mohuć pabačyć baćki ci susiedzi. Astatnija nadpisy ŭ asnoŭnym pryznačany nie kankretnym asobam, a prosta abranyja vypadkovyja imiony.
«NN»: Dyk u čym sens pisać nieisnujučym ludziam pryznańni ŭ kachańni?
SP: Kab pakazać ludziam, što kachańnie moža być roznym.
«NN»: Vy nie baiciesia, što pakryŭdzili vypadkovych Markaŭ ci Alehaŭ, jakija žyvuć pobač? Vy mahli stvaryć dla ich niepažadanuju reputacyju.
SP: My razumiejem, što drenna stvarać vypadkovym ludziam reputacyju hieja ci leśbijanki. I my nie chacieli b, kab takoje zdaryłasia. Ale ja dobra viedaju teoryju vierahodnaści. Heta amal niemahčyma, kab mienavita ŭ hetym miescy žyŭ čałaviek mienavita z takim imiom.
Pa-druhoje, ja spadziajusia, što niahledziačy, što heta akcyja, ludzi pabačać nadpisy i zrazumiejuć, što hiei i leśbijanki ŭ svaich pieražyvańniach takija ž, jak i ŭsie. Jany taksama dorać adzin adnamu kvietki, razam viešajuć zamočki na mastach i pakidajuć pryznańni na asfalcie. Jany pieražyvajuć tyja samyja trymcieńni va ŭzajemaadnosinach, jak lubyja zakachanyja.
«NN»: Heta była adzinkavaja akcyja ci budzie praciah?
SP: My płanujem praciahvać padobnyja fłeš-moby. U pieršuju čarhu tamu, što niekatoryja hiei i leśbijanki jašče sami nie hatovyja da padobnych pryznańniaŭ. My musim pakazvać, što heta taksama naturalna jak Mania + Vania = kachańnie. Kožny maje prava pryznacca ŭ svaich pačućciach i nie bajacca nieparazumieńnia z pryčyny svajoj seksualnaj aryjentacyi.
