Kancler Hiermanii Anhieła Mierkiel znoŭ padvierhła rezkaj krytycy prahramu Fiederalnaj reziervovaj sistemy ZŠA, jakaja praduhledžvaje skupańnie amierykanskich dziaržaŭnych ablihacyj.
Vystupajučy siońnia ŭ Bierlinie pierad vyletam na samit «vialikaj dvaccatki» ŭ Sieuł, kiraŭnik hiermanskaha ŭrada pieraścierahła, što «hety krok bahaty novymi ryzykami».
Kancler maje namier «u ramkach partniorskich pieramovaŭ zakranuć hetuju temu». Pavodle jaje słovaŭ, «Hiermanija nie budzie padtrymlivać dasiahnieńnie kolkasnych metaŭ». Kankurentazdolnaść krainy «musić mieć mahčymaść vykazvacca taksama ŭ jaje eksparcie», pierakananaja kiraŭnik urada FRH. «Ekanamičny rost pavinien być doŭhaterminovym», — dadała Mierkiel.
Niezadavolenaść u suviazi z pakupkaj FRS dziaržablihacyj na sumu $600 młrd vykazaŭ i ministr finansaŭ Hiermanii Volfhanh Šojble.
«U nas niama ni najmienšaj zacikaŭlenaści ŭ kanfliktach z ZŠA», — zaŭvažyŭ jon, dadaŭšy, što «FRH zacikaŭlenaja ŭ mocnaj Amierycy». «Adnak heta nie vulica z adnabakovym rucham», — skazaŭ niamiecki ministr finansaŭ.
Mierkiel pazityŭna adhuknułasia ab ekanamičnaj palitycy Kitaja ŭ Jeŭropie, jaki, pa jaje acency, «źjaŭlajecca nadziejnym spadarožnikam našaj biudžetnaj palityki». Udzieł KNR u padtrymcy Hrecyi i Partuhalii pakazvaje, što Piekin «vypraboŭvaje davier u dačynieńni da jeŭraprastory», ličyć fiederalny kancler.
