Inicyjatyŭnyja hrupy pretendentaŭ na pasadu prezidenta pracavali ŭ niaroŭnych umovach, zajavili aktyvisty kampanii «Pravaabaroncy za svabodnyja vybary» napres-kanfierencyi ŭ Minsku 19 listapada.
Padvodziačy vyniki zboru podpisaŭ za patencyjalnych kandydataŭ, juryst kampanii Valancin Stefanovič adznačyŭ, što hety etap prachodziŭ bolš libieralna, čym na papiarednich vybarach. Adnak što da vykarystańnia administracyjnaha resursu pry zbory podpisaŭ za Alaksandra Łukašenku, to tut naziralniki «nie adznačyli
«CVK svajoj pastanovaj № 47 faktyčna lehalizavała zbor podpisaŭ nie členami inicyjatyŭnaj hrupy. Tam zapisana, što zapisy ŭ padpisny list mohuć unosicca členam inicyjatyŭnaj hrupy, vybarščykam, a taksama inšymi asobami pa prośbie vybarščyka. I voś hetaja farmuloŭka pryviała da taho, što zbor podpisaŭ za kandydata ŭ prezidenta Łukašenku ažyćciaŭlaŭsia nie členami jaho inicyjatyŭnaj hrupy», — skazaŭ Stefanovič.
Jon źviarnuŭ uvahu na toje, što ŭ samoj CVK uźnikła błytanina z tłumačeńniem hetaha pałažeńnia. «Nam havaryli, što danyja vybarščyka ŭ padpisny list moža ŭnosić pamočnik člena inicyjatyŭnaj hrupy abo lubaja asoba ŭ prysutnaści člena inicyjatyŭnaj hrupy. Ale pra prysutnaść člena inicyjatyŭnaj hrupy tam ničoha nie napisana», — padkreśliŭ Stefanovič.
Heta, pavodle słoŭ pravaabaroncy, pryviało da poŭnaj nieprazrystaści pravierki zboru podpisaŭ, padadzienych za Łukašenku. «Mnie niezrazumieła, jak kamisii praviarali podpisy, kali artykuł 61 Vybarčaha kodeksa prama havoryć ab tym, što zapaŭniać padpisnyja listy majuć prava tolki členy inicyjatyŭnaj hrupy. I hety artykuł nichto nie admianiaŭ», — zajaviŭ juryst.
Stefanovič taksama zaŭvažyŭ, što za zbor podpisaŭ nie členami inicyjatyŭnaj hrupy było vyniesiena papiaredžańnie hrupie Uładzimira Niaklajeva. «Adnosna hrupy Łukašenki ničoha padobnaha nie adbyłosia», — kanstatavaŭ jon.
Akramia taho, pavodle słoŭ jurysta kampanii, vyklikajuć pytańni i mietadyčnyja rekamiendacyi CVK.
«U ich napisana, što pradstaŭnikam administracyi ŭstanoŭ zabaraniajecca źbirać podpisy ŭ svajoj ustanovie ŭ pracoŭny čas. Artykuł 61 Vybarčaha kodeksa zabaraniaje pradstaŭnikam administracyi ŭstanoŭ źbirać podpisy ŭ svajoj ustanovie naohuł. Ale ŭ Homieli prarektar univiersiteta źbirała podpisy za Łukašenku siarod studentaŭ svajho ŭniviersiteta prama ŭ faje. CVK paličyła heta zakonnym, bo jana znachodziłasia ŭ adpačynku. Adnak ad hetaha jana nie pierastała być prarektaram univiersiteta, ad jakoj zaležać studenty, jak dyrektar u adpačynku nie pierastaje być dyrektaram», — ličyć Stefanovič.
U adroźnieńnie ad inicyjatyŭnych hrup Łukašenki kamandy inšych pretendentaŭ nie mieli mahčymaści źbirać podpisy ŭ internatach i na pradpryjemstvach, adznačyŭ pravaabaronca. «Nivodnaja skarha na hetyja parušeńni nie była zadavolenaja», — padkreśliŭ Stefanovič.
