Na dniach źjaviłasia infarmacyja, što palityčnaja rada Demakratyčnych siłaŭ pastanaviła, što Alaksandar Milinkievič nia maje prava adzin vykarystoŭvać brend “Za Svabodu”, bo jon… naležyć usioj apazycyjnaj kaalicyi. Kab pierakanacca ŭ hetym, my źviarnulisia da kiraŭnikoŭ partyjaŭ, što ŭvachodziać u kaalicyju, a taksama da Milinkieviča.
Staršynia AHP Anatol Labiedźka miarkuje, što takim čynam palitrada paprostu rasstaviła pa miescach usie znaki prypynku, kab paźbiehnuć błytaniny. “Ab stvareńni ruchu “Za Svabodu” było damoŭlena supolnymi namahańniami ŭsioj kaalicyi, — kaža Anatol Labiedźka. — Tamu ciapier, kali hety brend vykarystoŭvaje ŭ svaich metach tolki adzin subjekt kaalicyi, ja liču nie zusim karektnym, bo jon naležyć usim, a nie adnamu jakomu-niebudź asobna ŭziatamu čałavieku. Što datyčyć ruchu “Za svabodu”, to my nie zusim kankretna razumiejem, što adbyvajecca ź jaho farmavańniem, jakija tam iduć pracesy. Zajaŭka peŭnaha subjekta na stvareńnie ruchu nibyta jość, ale my nia bačym, što jość u reale. Siabry našaj partyi sami vyznačajuć u jakich partyjach, ruchach ci klubach im być, my nikomu z partyjcaŭ nie zabaraniajem ustupać u ruch “Za svabodu”, ale taki padychod nia daść plonu. 1+1, jak ni kruci, zaŭsiody 2. Tamu, kali ŭ “Za Svabodu” buduć ustupać pradstaŭniki partyjaŭ, apazycyja nia vyjhraje, bo vynik budzie toj samy. My prosta abdurvajem sami siabie”.
Padobnaje mierkavańnie maje i staršynia Partyi BNF Vincuk Viačorka, jaki kaža, što ruch “Za Svabodu” źjaŭlajecca supolnym, kaalicyjnym, a nie vyklučna rucham Milinkieviča. Sp.Viačorka paćvierdziŭ, što na apošnim sojmie partyi byŭ pryniaty maratoryjum, jaki praduhledžvaje nieŭstupleńnie siabroŭ PBNF u ruch “Za Svabodu” na hetym etapie. “Bo my ciapier nie zusim razumiejem, što mienavita za ruch taki stvaraje Milinkievič, jakija asnoŭnyja pryncypy i pałažeńni jon budzie mieć, jakija ŭ ruchu kropki sutyknieńnia dla supracy z PBNF tamu, naturalna, što nam patrebny čas, kab pryhledziecca da hetaj inicyjatyvy”, – skazaŭ V.Viačorka.
“Ničoha kiepskaha ja nia baču, kali siabry našaj partyj źjaŭlajucca adnačasova i siabrami ruchu “Za Svabodu”, — kaža Valer Uchnaloŭ, namieśnik staršyni Partyi kamunistaŭ. – Nia viedaju, što datyčyć inšych partyjaŭ z demakratyčnaj kaalicyi, ale my nia čynim absalutna nijakich pieraškodaŭ, kab našyja partyjcy ŭ adnačaśsie stanavilisia i ŭdzielnikami ruchu “Za Svabodu”. Što datyčyć ruchu, to jon sapraŭdy supolny, a nie vyklučna Milinkieviča. Ale ž na dadzieny momant absalutna nichto nia stavić pad sumnieŭ liderstva Milinkieviča ŭ palityčnaj radzie, tamu adpaviedna jon źjaŭlajecca i lideram ruchu “Za Svabodu”.
Sam lider demakratyčnych siłaŭ Alaksandar Milinkievič kaža,što jon zaŭždy pracavaŭ na abjadnańnie apazycyi, a nie na jaje raźjadnańnie. “Ciapier u kiraŭnictvach našych demakratyčnych partyjaŭ papularnaja teza ab tym, što partyjcy najpierš pavinny pracavać na karyść svaich partyjaŭ, a nia niejkich ruchaŭ, — havoryć sp.Milinkievič. – Ja nie padzialaju hety pohlad. Ludzi ŭ rehijonach, u tym liku i partyjcy, hatovyja pracavać na karyść Biełarusi. Im niama roźnicy pracavać z kim mienavita, ci sa svajoj partyjaj, ci z rucham “Za Svabodu”. Viedajecie, ja stvaryŭ hety ruch, heta majo dzicia i my budziem pracavać z hetymi ludźmi, jakija stali siabrami ruchu, u lubym vypadku”. Nakont paviedamleńniaŭ pra toje, što kiraŭnictva peŭnych demakratyčnych partyjaŭ nie rekamenduje ŭstupać siabram svaich partyjaŭ u ruch “Za Svabodu”, Milinkievič adznačyŭ, što sapraŭdy čuŭ pra takija rašeńni, ale nie čytaŭ asabista kankretnyja dakumenty, tamu pakul nie hatovy kamentavać hetyja rašeńni.
