Raźviazka nacyjanalnaha pieršynstva pa futbole była padobnaja pa svajoj intryzie da halivudzkaha blakbastera. Nahadajem, što napiaredadni apošniaha 26 turu barysaŭski BATE na try punkty apiaredžvaŭ mienskaje «Dynama». Mienavita hetyja dva kluby tolki mahli pretendavać na załatyja medali. BATE čakaŭ zvyšciažki vyjezd u Salihorsk da miascovaha «Šachtara», jaki taksama praciahvaŭ zmahacca za bronzavyja medali ź mienskim MTZ-RIPA. Mienskaje «Dynama» jechała na matč u Bieraście da svaich adnaklubnikaŭ.
Usie pajadynki apošniaha turu musili byli pačacca ŭ adzin čas – 14:00, ale ŭ spravu ŭklinilisia pryrodnyja kataklizmy. Praź śniehapad u Bieraści matč dźviuch «dynamaŭskich» kamand byŭ adkładzieny na dźvie hadziny. Da hetaha času astatnija matčy turu byli ŭžo zhulanyja.
Spačatku ništo nie pakazvała na toje, što 16-ty biełaruski čempijanat budzie čakać takaja dramatyčnaja raźviazka. Dla čempijonstva BATE było dastatkova zhulać uničyju u Salihorsku. Paśla pieršaha tajmu hetaha pajadynku zadača nie vyhladała nievyrašalnaj. Hały Alaksandra Lebiedzieva i Ihara Stasieviča, zafiksavali na tabło paśla pieršaha tajmu lik 2:0 na karyść haściej. Adnak u druhim tajmie kamandy nibyta padmianili – salihorcy ŭžo na 62-j chvilinie, dziakujučy vysiłkam Išrefa Mahamiedava i Alaksandra Klimienki, vyraŭniali lik. A za čatyry chviliny da finalnaha śvistka ŭsio toj ža Klimienka, jaki nieŭzabavie staŭ najlepšym bambardziram pieršynstva z 17 hałami, vyvodzić «Šachtar» napierad. Sproby barysaŭcaŭ niejak źmianić u astatni čas chadu pajadynku ni da čaho nie pryviali.
«Šachtar» tryjumfavaŭ z pryčyny zavajavanych bronzavych medaloŭ, BATE ŭ rasčaravanych pačućciach nakiravałasia ŭ raździavalniu, u toj momant ni ŭ koha nie było sumnievaŭ, što ŭ čempijanacie budzie «załaty» matč.
Adnak nia ŭsio tak prosta. Bieraściejskija «dynamaŭcy» tak i nie dazvolili mienčukam raśpiačatać ułasnaje bramy. Hałoŭny trener barysaŭskaj kamandy Ihar Kryvušenka zajaviŭ, što jon viedaŭ, što bieraściejcy nie «źlijuć» matč z «Dynama».
Horyč ad parazy ŭ Salihorsku dla BATE źmianiłasia radaściu čempijonstva. Kamanda z Barysava ŭ treci raz u svajoj historyi zavajavała hety tytuł. Minułyja čempijonstvy BATE byli zafiksavanyja ŭ 1998 i 2002 hadach. Takim čynam vymaloŭvajecca nievialikaja tendencyja, što BATE stanovicca kamandaj numar adzin u krainie praz kožnyja čatyry hady.
Napiaredadni sezonu specyjalisty i analityki nie razhladali ŭsurjoz BATE, jak realnaha pretendenta na załatyja medali. Zanadta ŭžo mocna vyhladali ichnija kankurenty – «Šachtar», mienskaje «Dynama», MTZ-RIPA, «Homiel». Adnak barysaŭcy zmahli abvierhnuć mierkavańni skieptykaŭ i ŭzyści na viaršyniu tablicy. Hałoŭny kozyr BATE – heta razumnaje spałučeńnie maładości i vopytu. Za kamandu hulajuć užo nia raz zahartavanyja ŭ bajoch Alaksandar Fiedarovič, Alaksandar Jermakovič, Dźmitry Lichtarovič, Hienadź Bliźniuk i jašče zusim maładyja i niedaśviedčanyja Barys Pankrataŭ, Arciom Radźkoŭ, Dźmitry Płatonaŭ, Alaksandar Lebiedzieŭ.
Treba adznačyć, što barysaŭski klub sioleta zmoh zrabić załaty dubl, pieramohšy taksama ŭ traŭni i ŭ Kubku Biełarusi.
